Почна реконструкцијата и проширувањето на патот Хиподром – Илинден

Со поддршка на Владата, преку Центарот за развој на скопскиот плански регион денеска почна реконструкција и проширување на патот Хиподром – Илинден.

Проектот чини шест милиони денари, а средствата се обезбедени од Владата и општините Гази Баба и Илинден.

Градоначалникот на Општина Гази Баба Борис Георгиевски информира дека патот Хиподром – Илинден беше целосно оштетен, тесен и небезбеден за граѓаните.

„Денеска конечно почнува неговата реконструкција, која опфаќа обнова на асфалтот во должина од два километри и проширување на патот за уште една дополнителна лента. Со ова обезбедуваме поголема безбедност на возачите кои го користат овој пат, а исто така изграден се поставува и нов тротоар во должина од 2.000 квадратни метри, со што ја гарантираме и безбедноста на пешаците. Градиме плански и ги решаваме проблемите на граѓаните, создавајќи безбедна патна инфраструктура“, изјави Георгиевски.

Тој посочи дека се решава еден од големите проблеми на граѓаните од новата населба Хиподром 2 кои, како што рече, конечно добиваат безбедна улица која води кон новата населба.

Реконструкцијата се очекува да заврши за 30 дена.