Алкалоид со донација за студентските и училишните домови во Скопје

Заради капацитативната специфика на училиштата и на студентските и училишните домови  во услови на пандемија, за нивното функционирање што подразбира високо ниво на хигиена и честа дезинфекција, компанијата „Алкалоид АД Скопје“ донираше антисептички и дезинфекциски средства вредни близу пет милиони денари.

Донацијата на средства за дезинфекција од компанијата ‘Алкалоид не само што ќе го заштити здравјето на учениците, студентите и вработените туку и ќе го олесни спроведувањето на протоколите. Се надевам дека истите ќе се сфатат сериозно и ќе се почитуваат бидејќи тоа е единствениот начин да ја надминеме оваа состојба и да ги заштитиме нашите најблиски“, изјави Дарио Николовски, директор на „Државен студентски дом“ – Скопје.

Околу предизвиците на отварањето на студентските и училишните домови во вонредни околности, Мила Царовска, министерката за образование и наука, нагласи:

Навистина ми е драго што во вакви вонредни околности, односно во време кога се соочуваме со пандемија успеавме да најдеме начин да ги отвориме студентските и училишните домови и да обезбедиме сместување на студентите и учениците, коишто ќе ги следат предавањата и праксата со физичко присуство. Огромна благодарност до компанијата ‘Алкалоид’ којашто покажа вистинска општествена одговорност и донираше средства за дезинфекција и за одржување на хигиената во домовите. Во оваа прилика би сакала да ги повикам студентите и персоналот во домовите да ги почитуваат протоколите за заштита, бидејќи само така можеме да го спречиме ширењето на Ковид-19. Да се заштитиме самите себеси, но и нашите најблиски. Со почитувањето на мерките сите заедно допринесуваме за зачувување на јавното здравје

Од први октомври ќе има далечинско учење наместо конвенционална настава. Ова ќе биде учебна година во која сите чинители во образовниот процес имаат една заедничка цел: спроведување на процесот на едукација и зачувување на здравјето на учениците и студентите преку почитување на предвидените здравствени мерки и протоколи.

Оваа необична учебна година по многу нешта ќе се разликува од сите досегашни почетоци, но едукацијата е клучен фактор за развој на здраво општество и неминовно е дека ќе мора да се направи адаптација кон новото нормално, имајќи го предвид најважното: здравјето на студентите. Во таа насока, ние како компанија дадовме мал придонес кон адаптација на новите прилики во студентските и училишните домови донирајќи антисептици и средства за дезинфекција. На сите ученици и студенти, во оваа прилика би сакал да им посакам успешен почеток и добро здравје. Вие сте нашата иднина и треба да поставувате исклучителни примери кои треба да се следат. Почитувајте ги мерките за заштита и чувајте се!“, истакна генералниот директор и претседател на УО на „Алкалоид АД Скопје“, Живко Мукаетов.

Донацијата која „Алкалоид АД Скопје“ ја намени за студентските и училишните домови во Скопје се состои од 16.000 литри антисепички средства (полиалкохолен раствор „MEDICAL“ гел и „ЕCOSAL Forte“) и 17.100 литри готов раствор за чистење и дезинфекција (DEZINTAL 0,2%).