Инфлацијата во Европската унија се зголеми во октомври, надминувајќи 11 отсто, објави Европскиот завод за статистика, намалувајќи ја благо проценката за растот на потрошувачките цени во еврозоната.
Годишната стапка на инфлација во ЕУ, мерена преку хармонизираниот индекс на потрошувачките цени (HICP), во октомври достигна 11,5 отсто, ново највисоко ниво откако европската статистичка служба почна да објавува податоци.
Во септември изнесуваше 10,9 отсто, а во октомври лани 4,4 отсто.
Во еврозоната порасна од 9,9 отсто во септември на 10,6 отсто во октомври, објави Евростат, намалувајќи ја проценката од крајот на октомври за 0,1 процентен поен.
Намалената проценка одразува поблаг пораст на цените на енергијата, за 41,5 отсто во однос на минатогодишниот октомври. Пред две недели Евростат процени дека тие се зголемиле за 41,9 отсто.
Во октомври стапката на инфлација во еврозоната изнесуваше 4,1 отсто.
Заедно со скокот на цените на енергијата, посилен од септември кога пораснаа за 40,7 отсто, главен двигател на инфлацијата беше зголемувањето на цената на свежата храна, за 15,5 отсто во однос на ланскиот октомври.
Во септември цената порасна за 12,4 отсто.
На месечно ниво, растот на цените се забрза во октомври и во ЕУ и во еврозоната, од 1,2 во септември на 1,4 односно на 1,5 отсто.
Во споредба на септември, стапката на инфлација порасна во 13 земји членки, а падна во 11. Во три земји таа се задржа на септемвриското ниво.
Најмногу во октомври пораснаа потрошувачките цени во Естонија и Литванија, за 22,5 односно за 22,1 отсто.
Блиску се и Унгарија и Летонија, со раст на цените за 21,9 односно 21,7 отсто.
Во Хрватска, годишната стапка на инфлација, мерена со истиот индекс, во октомври изнесуваше 12,7 отсто и беше за 0,1 процентен поен повисока отколку во септември. Во октомври минатата година таа изнесуваше 3,9 отсто.
Италија, третата по големина економија, во октомври имаше инфлација од 12,6 отсто.
Во Германија, најголемата европска економија, таа изнесуваше 11,6 отсто.
Најслаб раст на потрошувачките цени во октомври бележеше Франција, од 7,1 отсто.
Следат Шпанија и Малта со раст на цените од 7,3 односно 7,4 отсто.
