Партизан одигра европски натпревар кој долго ќе се памети. Црно-белите вчера ремизираа 3:3 против Словачко во Ухерско Храдиште, во Чешка, во премиерниот меч од Конференциската лига за кој долго ќе се зборува.
Избраниците на Гордан Петриќ беа блиску до победа по големиот пресврт, но потклекнаа во 84. минута и имаат многу за жалење.
По првите 45 минути немаше навестување дека Партизан ќе однесе бод во Белград, бидејќи ништо не беше на страната на црно-белите.
Два брзо примени гола, црвен картон, ниту еден удар кон противничкиот гол…
Лошиот почеток на првото полувреме влијаеше на исходот на натпреварот.
Само пет минути им беа потребни на домашните да поведат преку левиот бек Калибишка. Истиот играч во 20 минута го удвои водството, но агонијата на гостите не заврши тука.
Само две минути подоцна, Кристијан Белиќ грубо стартуваше врз Рајнберк, а судијата Херви му покажа директен црвен картон на играчот за врска на црно-белите.
Колку беа инфериорни избраниците на Гордан Петриќ најдобро се гледа по тоа што во првото полувреме не упатија ниту еден удар кон голот на Нгујен.
Навистина, домаќините беа побројни на теренот. Интересно е и тоа дека Словачко дури во финишот од првото полувреме го направи првиот фаул на натпреварот.
А, она што се случи во второто полувреме беше навистина неверојатно.
Гостите направија чудесен пресврт, но немаа среќа да забележат триумф. Најпрво дојде до израз вчера сјајниот Фусени Диабате, кој си поигруваше со своите ривали. За шест минути постигна два гола. Партизан ја искористи добрата ситуација на теренот и преку Рикардо Гомеш успеа да дојде и до предност.
Се чинеше дека фудбалерите на Словачко ги потценија црно-белите во вториот дел од натпреварот. Сепак, тимот од Чешка успеа да дојде до реми и тоа во 84. минута кога Козак, по гужва во шеснаесетникот, успеа да ја затресе мрежата на гостите и тоа така што топката среќно го погоди и го измами Александар Поповиќ.
Партизан можеше и да победи, но ударот на Рикардо Гомеш го запре пречката.
Останува тагата што црно-белите не го започнаа натпреварувањето во Европа со победа, но настапот во второто полувреме може да ги радува сите во таборот на белграѓаните за продолжението.
За седум дена црно-белите ја пречекуваат Ница во вториот натпревар од Конференциската лига, додека Словачко гостува во Келн.
(Фото: ФК Партизан)
