Вицепремиерот задолжен за економски прашања, координација на економските ресори и инвестиции, Фатмир Битиќи денеска оствари онлајн средба со Управниот одбор на Стопанската комора на Македонија, на која се дискутираше за моменталните состојби на економијата во земјата, реализацијата на четирите пакети економски мерки, статусот на мерките од петтиот пакет, како и за активностите кои ги презема Владата за унапредување на бизнис климата во земјата.
Вицепремиерот Битиќи на средбата се осврна на реализацијата на четирите пакети економски мерки и посочи дека тоа што мерките се креирани во инклузивен процес, преку консултации со сите засегнати чинители, придонело истите да бидат реализирани со исклучителен успех, дури 87 отсто, што пак влијаело на тоа да се минимизира негативниот ефект врз економијата.
„Успешноста на мерките се гледа и во тоа што нивната имплементацијата придонесе за намалување на падот на бруто домашниот производ од 4,2 отсто. Односно, доколку истите не беа спроведени, падот на БДП ќе беше околу 8,7 проценти. Со нивното реализирање, бруто домашниот производ бележи пад од 4,5 отсто“, истакна Битиќи.
Вицепремиерот нагласи и дека Владата внимателно и постојано ги следи состојбите поврзани со кризата предизвикана од коронавирусот и дека навремено го креираше Петтиот пакет на мерки, кој на средината на февруари беше доставен до Собранието, за да се усвојат неколку закони кои се од голема важност за стопанството и граѓаните.
Тој посочи дека очекува во најбрзо време да се усвои Законот за финансиска поддршка за исплата за плати, при што рече дека со амандмански измени ќе се овозможи компаниите да може да аплицираат за поддршката до 30-ти април и на тој начин да им се излезе во пресрет на компаниите.
На состанокот се дискутираше и за процесот за укинување или намалување на парафискалните давачки, којшто е веќе започнат и се спроведува во заедничка соработка помеѓу државните органи и бизнис секторот.
„Започната е постапката за формирање на единствен регистар за државна помош, кој ќе биде единствената точка за сите информации поврзани со државната помош, со кој ќе се постигне хармонизација на планирањето и буџетирањето и ќе се добие транспарентен и отчетен систем за помошта која ја обезбедува државата кон компаниите“, информираше Битиќи.
Претставниците на Стопанската комора на Македонија беа известени дека во напредна фаза е и подготовката на измените и дополните на Законот за финансиска поддршка на инвестиции, со кои, поради кризата предизвикана од Ковид-19, ќе се олеснат условите за аплицирање и исплата на поддршката кон компаниите кои реализирале нови инвестиции.
Битиќи се осврна и на Законот за стратешки инвестиции, со кој се овозможува брза реализација на проекти кои се од јавен интерес и се проекти со кој се реализира инвестиција во висина од најмалку 100 милиони евра на територија на најмалку две или повеќе општини, најмалку 50 милиони евра во општините со седиште во град, општините во градот Скопје и градот Скопје или најмалку 30 милиони евра во општини со седиште во село.
Вицепремиерот информираше дека од јануари оваа година со поддршка на Амбасадата на Обединетото Кралство и Организацијата на Обединети Нации, претставувана од канцеларијата на УНДП во земјата, е започнат процесот на информирање на сите засегнати страни за креирање на долгорочната Национална развојна стратегија 2021-2041 на Македонија.
Тој посочи дека процесот на креирање на Националната развојна стратегија ќе се одвива во две фази, во првата фаза ќе се дефинира медотодолијата и оперативната структура која ќе ја развива стратегијата, додека втората фаза ќе биде развојот на стратегијата.
Вицепремиерот Битиќи нагласи дека Националната развојна стратегија треба да отслика меѓугенерациски, родов, меѓутнички, меѓупартиски и долгорочен консензус за приоритетите на државата, со цел да се обезбеди инклузивен, зелен и одржлив развој за сите, а особено за ранливите категории на граѓани.
Во рамки на овој проект ќе се идентификуваат и зајакнат врските помеѓу сите останати стратешки важни процеси кои се одвиваат во државата, првенствено
интеграцијата во ЕУ и Агендата 2030 за одржлив развој.