Владата синоќа ги усвои измените на Законот за здравствена заштита со кои ќе се регулираат цените во приватните болници за лекување на болните од Ковид-19.
Со нив и се дава законско овластување на Владата да определува највисоки цени во приватните болници во висина на референтните цени утврдени од страна на Фондот за здравствено осигурување со цел услугите на приватните клиники да бидат економски подостапни до граѓаните.
Предвидено е и користење на ресурсите на приватните болници доколку условите го наложуваат тоа согласно состојбата предизвикана од пандемијата, се забранува преземање на здравствени работници од јавното здравство од страна на приватните здравствени компании, и зголемени парични казни за прекршоци за непостапување согласно законските одредби.
Измените треба да ги усвои Собранието, а министерот за здравство Венко Филипче, кој вчера прв ги најави овие измени, апелираше до пратениците да дадат поддршка на оваа законска регулатива.
„Ги повикувам сите пратеници во Собранието да дадат поддршка на оваа регулација на цените за здравствени услуги на ковид-пациенти во приватните болници. Во време на пандемија од клучна важност е пратениците да го изгласаат оваа законско решение со кое цените за третман на пациенти во приватните болници ќе бидат финансиски
издржливи за сите граѓани“, напиша Филипче на Фејсбук