На платото пред Министерството за одбрана и Генералштабот на Армијата во Скопје денеска ќе биде одбележан Денот на Армијата на Македонија.
На прославата обраќање ќе имаат претседателот на Македонија и врховен командант, Стево Пендаровски, министерката за одбрана, Радмила Шекеринска, и началникот на Генералштабот, генерал-потполковник Васко Ѓурчиновски.
Во рамки на свеченоста ќе бидат доделени одликувања и признанија на единици од Армијата и соработници кои придонесуваат за развојот на одбраната.
Претседателот Пендаровски ќе врачи Орден за воени заслуги, додека министерката Шекеринска и началникот Ѓурчиновски ќе доделат признанија на претставници од институции со кои соработува Армијата.
Командантот на Националната гарда на Вермонт, генерал-мајор Грегори Најт кој се наоѓа во неколкудневна работна посета на Македонија, на Шекеринска ќе и додели медал за истакната служба, а на генералот Ѓурчиновски медал за заслуги.
На централната свеченост ќе присуствуваат и претседателот на владата на Македонија, Зоран Заев, пратеници, министри, претставници од воено дипломатскиот кор, градоначалници, поранешни министри за одбрана и началници на генералштабот, армиските генерали, претставници од организации, државни институции, општини и здруженија со кои соработува Армијата.
По повод одбележувањето на Денот на Армијата, со воени почести и полагање венци цвеќе на Алејата на великаните на градските гробишта во Бутел во Скопје, повеќе делегации ќе им оддадат почит на поранешните претседателите и врховни команданти на Армијата, Борис Трајковски, Киро Глигоров и на гробот на генерал Михаило Апостолски, како и на спомен обележјето на загинатите бранители во кругот на Министерството за одбрана и Генералштабот.
За роденден на Армијата е избран 18 август, денот кога во 1943 година на Славеј Планина бил формиран баталјонот „Мирче Ацев”, кој се смета за првата организирана воена формација на НОВ на Македонија.
Процесот за формирање на современата македонска армија, пак, започна во 1992 година, кога тогашниот претседател Киро Глигоров, со раководството на ЈНА го потпиша договорот за дислокација на федералната армија од територијата на Македонија.
Македонската Армија денес заедно со армиите на уште 29 земји е составен дел од најголемиот колективнен безбедносен систем откако Македоонија во март минатата година стана 30 полноправна членка на НАТО.