Американскиот истражувачки центар „Пју“, денеска објави резултати од анкета спроведена во САД и земји од Западна Европа, а поврзана со мислењата на граѓаните за нивните влади, политичкиот систем, демократијата и други прашања.
Анкетата била оддржана во ноември и декември 2020 година со испитани 4.100 лица во САД, Франција, Германија и Велика Британија.
Еден од заклучоците на истражувањето е тоа дека довербата во власта е поголема меѓу оние кои сметаат дека земјата добро се справила со пандемијата. Поголемата доверба е исто така поврзана и со добрата економска ситуација. Сепак, независно од нивото на задоволство од работата на владата, мнозинство од испитаниците истакнуваат дека е потребна реформа на политичките системи во нивните земји.
Во споредба со 2017 година, нивото на доверба кон власта пораснало во сите земји каде е извршено испитувањето. Тоа најмногу пораснало во Франција, од 20 на 55 отсто и во Германија, од 69 на 80 отсто. Незначајно пораснала довербата во Велика Британија (од 49 на 55 отсто) и во САД (од 51 до 54 проценти).
Притоа, иако повеќе од половина Американци сметаат дека владата работи исправно, само 45 отсто од нив изразиле задоволство од работата на демократијата во нивната земја. Се истакнува дека анкетата е сепак сработена пред насилниот упад во Капитолот на 6 јануари од страна на толпа поддржувачи на екс-претседателот Доналд Трамп. Во Франција, нивото на задоволство од демократијата меѓу испитаните достигнало 55 отсто, во Велика Британиа 60 проценти, а во Германија 80 проценти.
На прашањето „Дали е потребна реформа на политичкиот систем во вашата земја“, 65 отсто од испитаните Американци сметаат дека нивниот политички систем има потреба од „големи промени“ или „целосна реформа“, додека во Велика Британија тие што се за големи промени се 47 отсто, а тие што се за мали се 38 отсто. Во Германија пак, мнозинство од анкетираните (49 отсто) кажале дека сакаат да видат мали промени, 35
отсто дека сакаат големи, а четири отсто бараат целосна реформа. На истото прашање, 47 отсто од испитаните Французи одговориле дека се потребни големи промени на политичкиот систем, 23 отсто кажале дека „е потребна целосна реформа“, додека 25 отсто рекле деке се потребни мали, а шест проценти не гледаат потреба од некаква промена.
На прашањето „Дали сметате дека мнозинство од политичарите се корумпирани“?, потврдно одговориле 67 отсто од прашаните Американци, 46 проценти од Французите, 45 проценти од Британците и 29 отсто од Германците.
Во однос на идејата за директна демократија резултатот на анкетата е позитивен меѓу сите испитани. Во САД по ова прашање се изјаснале 79 отсто од Американците, од кои 36 сметат дека директната демократија е донекаде важна, а 43 сметаат дека е многу важна, за создавање на граѓански собранија каде би можело да дискутираат закони и да се даваат препораки за тоа. Во Франција такви мерки поддржуваат 77 отсто од
испитаниците, во Германија 76 отсто а во Велика Британија 74 отсто.
Мнозинство од испитаните исто така поддржуваат и спроведување референдуми за најважните прашања или закони во своите земји. Така, во САД за референдумот како алатка се застапуваат 73 отсто од Американците, од кои 31 отсто сметаат дека таа е важна а 42 проценти дека е многу важна. Во Франција за референдуми застапуваат 70 проценти од анкетираниите, во Франција 68 отсто а во Велика Британија 63 отсто.