„Врвен приоритет на Владата предводена од СДСМ и премиерот Зоран Заев е грижата за најмладите, за децата. Силна потврда за тоа е фактот дека од септември 2020 година до сега, за само десет месеци отворивме 13 нови детски градинки и на тој начин го зголемивме капацитетот на сместување за 840 дечиња“, стои во денешното писмено соопштение од владеачкиот Социјалдемократски сојуз.
Социјалдемократите информираат дека уште 12 градинки ќе се отворат до крајот на 2021 година и со тоа капацитетот ќе се зголеми за дополнителни 1.390 места.
„Со ова темпо несомнено се приближуваме кон исполнување на даденото предизборно ветување пред граѓаните, односно опфат на 60% од децата во предучилишно воспитание и образование. Имаме верба дека до крајот на мандатот ќе успееме да го постигнеме овој процент со нашата посветена работа“, се наведува во соопштението.
Меѓу другото, од СДСМ велат дека паралелно со изградбата на нови детски градинки, реконструкција и проширување на постоечките објекти и нивно опремување, тие инвестирале и во јакнење на компетенциите на стручниот кадар, кој се грижи за децата. Зотоа што, како што напоменуваат, воспитувачот на директен начин придонесува во правилниот раст и развој на детето.
„Како одговорна, социјалдемократска партија, го вративме достоинството на професијата воспитувач која беше заборавена години наназад. Ги зголемивме платите на вработените во детските градинки во нашата држава за висок 21%. Вложувањето во најмладите е вложување во нашата иднина, затоа што тие се нејзини градители. Токму затоа, продолжуваме посветено да работиме на подобрување на
раниот детски развој којшто е клучен за понатамошниот развој на детето“, заклучуваат од СДСМ.