СДСМ на 13 јули ќе ги објави првите 20-тина кандидати за градоначалници, а ВМРО-ДПМНЕ веќе има дефинирано 15-на комплетно нови имиња и до средината на месецов ќе соопшти уште толку.
Двете партии за своите кандидати сметаат дека се фаворити. Според генералниот секретар Љупчо Николовски, СДСМ ја креира најдобрата понуда за секоја општина, додека според лидерот Христијан Мицкоски, кандидатите на ВМРО-ДПМНЕ ќе победат зашто во споредба со оние од СДСМ имаат што да понудат.
СДСМ во изминатиот период го засили присуството на терен под слоганот „Најдоброто“. Партијата завршила со истражувања, анкети и анализи за 20-тина општини, по што се очекува во наредните десетина дена да финишираат постапките во општинските органзиации, а потоа ќе следи и јавно објавување на кандидатите.
„Ќе ја креираме најдобрата понуда за секоја општина на овие локални избори. СДСМ е фаворит на изборите“
Љупчо Николовски
Имаме поголем рејтинг од ВМРО-ДПМНЕ и на ниво на лидери и на ниво на партии“, истакна Николовски на средба со новинарите.
Според него, ако на тоа се додаде коалицискиот капацитет на СДСМ, јасно е дека СДСМ е победник на изборите.
„Наши партнери во Владата се ДУИ и ДПА и очекувам на ниво на лидери да се случи средба на која ќе се дефинира принципот на соработка за локалните избори. На кој начин, во кој обем, во кои населени места, во кој круг и слично ќе зависи од договорот. Коалицијата на СДСМ е победник на изборите“, порача Николовски.
Досега, додаде, има 562 кандидата за градоначалници и 4.530 кандидати за советници.
Повеќе детали за изборна соработка, рече, ќе можат да се соопштат по лидерската средба Заев – Ахмети која се очекува идната недела.
Заев веќе имал средба со лидерите од коалицијата на СДСМ и од нив не било најавено дека ќе имаат посебни кандидати за градоначалници.
„Нашите кандидати за градоначалници се многу поразлични од тие на СДСМ и имаат што да понудат и поради тоа ќе бидат победници…“
Христијан Мицкоски
„За локалните избори веќе имаме 15-на имиња дефинирано, уште толку до средина на јули очекуваме да бидат дефинирани како најсериозни каднидати, а конечно сите кандидати ќе ги објавиме во септември. Актуелните 15 имиња се сериозни фаворити“, рече Мицкоски.
Мицкоски оцени дека по изборите ќе се сменат многу работи на политичката сцена.