Претседателот на Собранието Талат Џафери за утре во 14 часот го закажа продолжението на 32-та седница, а по завршување на 32-та, ќе продолжи 36-тата, на која, меѓудругото треба да се гласа и за трите закони кои се однесуваат на петтиот пакет антикризни мерки.
Во четвртокот Џафери ја прекина 32-та седница и најави дека е можно да предложи карантин за Собранието.
Имено, до доцна вечерта траеше жолчната расправа во која координаторите на пратеничките групи, дел од пратениците и претседателот на Парламентот повеќе од два часа, преку процедурални забелешки, расправаа дали да се гласа за 21 точка од 32-та седница и потоа да продолжи 36-тата седница или да се одложи гласањето поради немање кворум и да продолжи 36 седница, на која се и три закони од петтиот пакет антикризни мерки.
Координаторот на пратеничката група на СДСМ Јован Митрески соопшти дека тројца пратеници од нивните редови се во болница поради Ковид-19, и поради тоа владејачкото мнозинство нема кворум.
Џафери инсистираше да се изгласа 21-та точка од 32 седница, па потоа да се продолжи со 36-тата седница, а опозицијата бараше да се одложи гласањето доколку парламентарното мнозинство нема кворум и да се почне со 36-тата седница.
Опозиционерите одлучија да излезат од салата за да не создадат кворум за гласање по точките од 32 седница.
Спикерот Џафери откако констатираше дека на списокот за евиденција како присутни во Собранието се пријавиле 101 пратеник, кои треба да бидат во салата, почна да ги чита нивните имиња, за, како што рече, да слушнат граѓаните кои се тие кои земаат плата, а не учествуваат во работата на Собранието.
„Пратениците имаат обврска да присуствуваат во салата, а нивно право е дали ќе гласаат или нема да гласаат, или пак, ќе учествуваат во дебатата или нема да учествуваат. Не можам секој ден да плаќам патни трошоци за 101 пратеник, а во сала да бидат присутни 58 или 59 пратеници“, рече Џафери во четвртоток, кој ја искритикува опозицијата дека го блокира Собранието, а пратениците дека ги спроведуваат партиските одлуки наместо да работат во интерес на граѓаните.
„Се повикувате дека работите за граѓаните, тогаш повелете работете за нив“, рече Џафери.
Пратеникот од Левица, Димитар Апасиев, му посочи на Џафери дека кога не може да се создаде кворум, тогаш треба да го прифати ултиматумот од опозицијата, на што претседателот на Собранието рече дека не прифаќа ултиматуми.
(Фото: МИА)