Триесет и пет државјани на Авганистан, кои времено престојуваа во Македонија, денеска заминале за Грција каде им е обезбедено трајно живеалиште, соопштија од македонската влада.
„Групата ја сочинуваат активисти за човекови права и женски права и членови на нивни семејства. Во изминатиот период нашата земја им обезбеди привремено засолниште како дел од големата меѓународна операција за помош на вработени во хуманитарните, демократски и миротворни меѓународни мисии, активисти од организациите за човекови права, преведувачи, студенти и стипендисти и нивни семејства, а се под закана на новиот талибански режим во земјата“, иформираа од владата.
Во земјава престојуваат 407 граѓани од Авганистан.
„Институциите, во текот на нивниот престој им ја пружаат целата потребна поддршка додека не се обезбеди трансфер до нивната крајна дестинација. Трошоците во целост се покриени од меѓународните организации“, посочија од владата.