Приватните автобуски превозници „Слобода превоз“ и „Мак експрес“ по девет дена блокада ги тргнаа автобусите што беа паркирани на „Илинденска“ пред Град Скопје.
Ова доаѓа откако премиерот Димитар Ковачевски вчера го прифати барањето да се сретне со превозниците, но тоа да не биде со притисоци и со уцени. Тој ги повика незадоволните превозници да го одблокираат Скопје за да може да се отвори можност за дијалог без притисок.
„Кога ќе се исполнат условите да имаме дијалог базиран врз основа на факти, врз основа на сите кои што се вклучени и кои што се надлежни да го решат проблемот и кога тој дијалог ќе започне без притисок, односно кога улиците ќе им бидат вратени на граѓаните на Градот Скопје, тогаш може да го одржиме состанокот“, рече Ковачевски и додаде дека на средбата мора да се присутни и надлежни органи од Град Скопје.
По ова, вчера директорот на „Слободна превоз“, Ленин Јовановски одржа прес-конференција на рече дека во целост ќе го испочитуваат барањето на премиерот и ќе ја прекинат блокадата, само за да има институционално решавање на проблемот.
Јовановски се согласи на најавената средба тие како претставници на приватните превозници да ја презентираат целата документација со која располагаат.
Приватните превозници тврдат дека Град Скопје им должи 90 милиони денари. Откако градоначалничката Данела Арсовска ги отфрли ваквите наводи, компаниите во знак на протест на 5 декември блокираа дел од клучните раскрсници во Скопје. Четири дена автобусите ги „паркираа“ долж „Илинденска“.
(Фото: МИА)
