Анџела Прајс Агелер е новата американска амбасадорка во Скопје

LinkSense.mk

Анџела Прајс Агелер ќе ја замени Кејт Мари Брнз на местото амбасадор на САД во Македонија.

Информацијата и официјално ја потврди демократското мнозинство во Сентатот на својот Твитер профил.

Минатата недела, Комисијата за надворешни работи на американскиот Сенат имаше сослушување за нејзината номинација, на кое таа најави дека работи „да ѝ помогне на Северна Македонија да развие национална стратегија со која ефективно ќе се бара одговорност од корумпираните актери“, пренесува Гласот на Америка.

САД и Северна Македонија имаат многу заеднички приоритети, вклучувајќи ги борбата против корупцијата, подобрување на владеењето на правото и зајакнување на доброто владеење. Доколку бидам потврдена, ќе ги охрабрам судските реформи и ќе ги повикам институциите на Северна Македонија да промовираат транспарентност во истрагата на наводите за злоупотреба и одлучно да се спротивстават на корупцијата за да ја зајакнат довербата на јавноста во владеењето. Ќе работам со меѓуагенциските партнери за да ѝ помогнам на Северна Македонија да развие национална стратегија која ефективно ќе бара одговорност од корумпираните актери. Доколку бидам потврдена, ќе работам на поддршка на економската иднина на Северна Македонија преку политики за зајакнување на нејзината инвестициска клима, зајакнување на инфраструктурата, подобрување на енергијата, различноста и безбедноста, и на градење отпор на малигни надворешни влијанија, вклучително и од Русија и Кина“, рече тогаш Агелер, истакнувајќи ги приоритетите на најзината работа како нова амбасадорка.

Агелер, исто така, истакна дека САД ја поддржуваат Македонија во нејзината долготрајна цел за пристапување во ЕУ.

Ние цврсто стоиме зад процесот на проширување на ЕУ затоа што го унапреди демократскиот развој и промовираше мир, стабилност и просперитет на европскиот континент, градејќи посилни стратешки партнери за САД. Северна Македонија ги надмина тешките предизвици и направи тешки избори да направи историски чекори напред на нејзиниот пристапен пат. Доколку бидам потврдена, ќе се надоврзам на овие успеси за да го обезбедам тој пат напред, рече Агелер.

Според неа, САД и Македонија треба да продолжат тесно да соработуваат во одговорот на заканите за безбедноста и меѓународниот поредок, по инвазијата на Русија на Украина.

Итноста на овој момент ја нагласува важноста од подлабока политичка, економска, културна, безбедносна соработка и врски меѓу луѓето со Северна Македонија и другите земји од Западен Балкан додека тие работат на остварување на нивните стратешки цели за европска интеграција“, изјави Агелер.

Агелер, која ќе ја замени досегашната амбасадорка Брнз која е во Скопје од 2019 година, претходно има работено на разни функции во Стејт департментот, меѓу кои и во Американската амбасада во Македонија, задолжена за односи со јавност.