Протестот на станарите на „Белград на вода“ најавен за саботата на 11 март не се случи, но тоа не значи дека проблемите што станарите во одредени згради од овој комплекс ги имаат исчезнале или дека ги немало.
Поплавени згради, влажни ѕидови, влага и вода на нивоата каде што се гаражите – ова се само дел од проблемите со кои се соочуваат, пред се, станарите во зградите „Аурора“ и „Аркадија“.
Сопственик на стан се жали дека дури три автомобили му биле уништени затоа што на неговото паркинг место течело, како што вели, „цементно млеко“, уште од минатата година.
Друг истакнува дека мајстори веќе две недели засилено оделе по становите и ги санирале дефектите, и дека им ветуваат уште посилна динамика на поправки.
Што се однесува до влагата, евидентно е дека таму една година постојано работат машините за извлекување на влага.
Има „оптимисти“ кои велат дека работите во нивните влезови привршуваат, а се надеваат дека наскоро ќе завршат и други градежни работи за целата населба да го добие планираниот изглед.
Кога се слушнало за протестот и се појавија информациите дека станбената заедница од „Херцеговска“ 21 имала во план да ги тужи носителите на проектот и извршителите на работите, како и подизведувачите, фирмата Страбаг, која е изведувач, веднаш закажала средба со станарите.
Протестот е најавен со цел да се решат проблемите на станбената заедница кои главно се однесуваат на квалитетот на работите што се вршат на овие два станбени згради и, како што се наведува, поради неисполнетите обврски на „Белград на вода“ кон сопствениците на станови.
„Вода навлегува во сите гаражи, зградата полека тоне, распукува, пропаѓа поради количината на вода.
Противпожарните апарати и системите за вентилација не работат, канализацијата се враќа до 20-ти кат“, се наведува во мејлот кој е испратен до новинарите и станарите од зградата.
Во него пишува и дека „фасадите и прозорците паѓаат“, дека се случуваат кражби, дека водоводните цевки пукаат и дека девет месеци никој ништо не прави.
На протестот пристигнале само новинари, а како што објави Бета, вечерта им било кажано дека изведувачите им рекле на станарите дека нема да ги санираат дефектите доколку јавно зборуваат за нив и дека ќе ги решат проблемите наведени во интерниот документ.
Проблемите со квалитетот на зградите во „Белград на вода“ датираат од порано.Исто како и најавите на експертите за тоа дека целиот тој дел од градот не само симболично, туку и буквално, лежи на вода и дека може да се појават вакви проблеми.
Модерниот комплекс на згради веднаш до реката Сава е изграден врз основа на „рушењето во Херцеговска“ кое во пролетта 2016 година го извршија маскирани напаѓачи и за кое организаторите никогаш не одговараа.
Проблемите со квалитетот на зградите не „одат рака под рака“ ниту со цените на метар квадратен во „Белград на вода“.
Најскапиот квадрат стан во цела Србија во последниот квартал од минатата година бил токму во една од зградите, во просек по 4.418 евра. Според податоците на српскиот Републички геодетски завод, најскапите недвижнини и понатаму се во комплексот, каде е постигната цена од 10.400 евра за метар квадратен. Најмногу платен е индивидуален стан со вкупна површина од 383 квадрати, и истиот чини 2,4 милиони евра, а исто така се наоѓа во истиот комплекс.
(Фото: Бета / Милош Мишков)
