Блокиран планот на Бајден за задолжително вакцинирање

LinkSense.mk

Американскиот Врховен суд го блокираше планот на претседателот Џо Бајден за задолжителна вакцинација или редовно тестирање за вработените во големите компании, но дозволува неговата администрација да наметне посебни услови за здравствените установи кои се финансирани од федералната власт.

Судот ја донесе одлуката откако минатиот петок ги сослуша усните аргументи во правната битка околу времените наредби кои во ноември ги издадоа две сојузни агенции за да ја зголемат стапката на вакцинацијата на работните места во големите компании, кои опфаќаат 80 милиони американски работници, и во сојузните здравствени установи.

Судот, кој има конзервативно мнозинство, беше поделен и во двата случаи. Во првиот случај, шест судии гласале за блокирање на наредбата за задолжително вакцинирање или тестирање на работното место, а во вториот, пет судии ја поддржале заложбата за здравствените работници, додека четворица биле против.

На либералното мнозинство во вториот случај му се придружија двајца судии од конзервативните редови, Џон Робертс и Брет Кавано. Обврската се однесува на 10,3 милиони работници во 76.000 сојузни здравствени установи.

Претседателот Бајден во септември ги претстави прописите за зголемување на стапката на вакцинација на возрасни како начин за борба против пандемијата, која усмрти повеќе од 845.000 Американци и ја оптовари економијата.

 

 

 

 

(Фото: МИА)