Бројот на новозаразени со корона во светот се стабилизира

Светската здравствена организација (СЗО) соопшти денеска дека бројот на нови случаи со ковид-19 ширум светот се стабилизира на 4,5 милиони неделно, после сталниот пораст во последните два месеца.

Во неделната проценка за пандемијата СЗО наведува дека бројот на новозаразени на Западниот Пацифик порасна за околу 20 отсто, на целиот американски континент за осум отсто, додека во останатите региони од светот или останал на исто ниво или се намалил.

Најмногу нови случаи бележат Соединетите Американски Држави, Иран, Индија, Велика Британија и Бразил.

Изминатата недела во светот од последици од корона вирус починаа окоилу 68.000 луѓе, а Европа и американскиот континент бележат раст на бројот на смртни случаи од околу 10 отсто.

Во извештајот се напоменува дека неколку неодамнешни студии покажуваат дека одобрените вакцини и понатаму пружаат заштита од сериозни облици на болеста, но дека постојат докази кои покажуваат дека вакцините се помалку ефикасни во заштитата од позаразните варијанти на вирусот.

Вкупниот број на заразени во светот до 24 август е 212.357.898 лица, а починати се 4.439.843.