Ралф Шорти, истакнат член на тимот на Доналд Трамп во Оклахома, уапсен е поради вмешаност во малолетничка проституција откако полицијата го пронајде во мотел со малолетно момче и со дрога, пренесува британски „Индепендент“.
Шорти (35) во текот на претседателската кампања се претставуваше како застапник на семејните вредности. Стана сенатор на Оклахома во 2010 година.
Според служениот извештај, полицијата го пронашла во мотел со седумнаесетгодишник на 9 март годинава.
Во документот е наведено:
„Полицајците забележале силен мирис на марихуана во собата и пронашле отворена кутија со кондоми во ранецот на обвинетиот Ралф Шорти. Полицијата во мотелот отишла откако добила дојава од таткото на детето, којшто се посомневал дека со ’неговиот син нешто не е во ред’“.
Детето и сенаторот се запознале преку апликација.
Момчето признало дека неколку пати имал секс со лицето којшто го запознал на тој начин, и дека сексот бил спогодбен.
Полицијата ја открила преписката меѓу Шорти и момчето, во која сенаторот малолетникот го нарекувал „лошо момче“, и му нудел пари во замена за секс.
Момчето на сенаторот му напишал дека му недостасуваат пари за пролетниот распуст, после што почнала размена на сексуално експлицитни пораки и фотографии.
За сега не е јасно дали сенаторот и момчето имале сексуален однос или не, пренесува „Тајм“.
Шорти е приведен во локалниот затвор во Мур, предградие на Оклахома сити, но со кауција од 100.000 американски долари е пуштен два часа подоцна.
Политичарите од двете најголеми партии во Оклахома побараа негова оставка, вклучувајќи ја и републиканската гувернерка Мери Фелин.
За случајот, Фелин изјави:
„Обвинувањата против него не се одраз на карактер и однесување какви што очекуваме од избраните службеници“.
Сенатот, претходно, во понеделникот го казни Шорти поради „недолично однесување“. Шорти, меѓу останатото се залагаше за правото за носење оружје и силно се спротиставуваше на правото на абортус.
Американската јавност бара посебна истрага за сенаторските седумнаесет години работен стаж во програмата за развој на младите, со оглед дека после овој инцидент се појави оправдано сомневање дека можеби ја злоупотребувал својата положба.
„Моментно немам коментар, но наскоро ќе се обратам со соопштение“, им рекол Шорти на новинарите по излегувањето од затвор.
