ВМРО-ДПМНЕ ја обвини СДСМ дека се обидува да се дистанцира од српскиот претседател Александар Вучиќ по поразот на парламентарните избори, посочувајќи ги претходните средби и јавните изјави на Венко Филипче, Зоран Заев и Димитар Ковачевски.
„СДС и Венко Филипче сакаат да се дистанцираат од Александар Вучиќ по поразот на парламентарните избори. Залудни им се обидите да се исперат пред јавноста“, наведуваат од ВМРО-ДПМНЕ.
Од партијата потсетуваат на периодот кога СДСМ беше на власт, тврдејќи дека тогашните владини претставници одржувале блиски односи со српското раководство и јавно ја истакнувале соработката со Вучиќ и тогашната српска премиерка Ана Брнабиќ.
Во соопштението се споменува и донацијата на вакцини од Србија за време на пандемијата со КОВИД-19, кога тогашниот министер за здравство Венко Филипче и поранешниот премиер Зоран Заев јавно се заблагодарија за помошта.
ВМРО-ДПМНЕ се осврнува и на односите на Заев со Вучиќ, како и на средбите на поранешниот премиер Димитар Ковачевски со српскиот претседател, обвинувајќи ги поранешните функционери на СДСМ дека негувале блиски лични и политички релации со него.
Од владејачката партија тврдат дека политиките на СДСМ не биле во интерес на македонските национални интереси и ја критикуваат партијата за односот кон прашањата поврзани со македонскиот јазик, културата, историјата и националното достоинство.
„Му слугуваа на кој стигнат, само за свои лични интереси, на штета на интересите на граѓаните и државата“, се наведува во соопштението на ВМРО-ДПМНЕ.
