Во пожар во Алжир загинаа 42 лица, од нив 25 војници

„Дваесет и пет војници загинаа во пожарот што повеќе од 24 часа беснее на северот од Алжир“, соопшти синоќа претседателот Абделмаџид Тебун.

Вкупниот број на жртви сега изнесува 42 лица.

„Со голема тага, ја примив веста за мачеништвото на 25 војници, кои успеаја да спасат стотина граѓани од огнот во планините Бејаи и Тизо Оузоу“, напиша Тебун на својот Твитер профил, пренесуваат француските медиуми.

И премиерот Ајман Бенабдерахмане изјави дека смртно настрадале вкупно 42 лица, од кои 25 војници. Тој за државната телевизија изјави дека владата побарала меѓународна помош.

Алжирската Влада соопшти дека пиромани се одговорни за десетиците шумски пожари во кои загинаа луѓе и се уништени куќи источно од главниот град.

Чад вчера се креваше од опожарената шума во близина на Тизи Оузоу, а жителите се обидуваа да го изгаснат со гранки и вода од канистри.

„Неколку куќи изгореа, а семејствата се евакуирани во хотели, хостели и универзитетски кампуси“, изјави очевидец.

“Имавме ужасна ноќ. Мојата куќа изгоре целосно”, изјави Мохамед Качи, кој избегал со семејството од селото Азазге и привремено се сместил во хотел.

Министерот за внатрешни работи Камел Белџуд вели дека истрагата ќе утврди кој е одговорен за пожарите.

„Само криминални раце можат да стојат зад педесет истовремени пожари низ провинцијата“, рече министерот на државната телевизија.

Пожарникарите и војската се уште се обидуваат да ги стават пожарите под контрола, а Белџуд рече дека најважно е да се спречи загубата на човечки животи. Тој додаде дека жртвите ќе добијат обештетување.

Од понеделникот вечерта во 13 провинции низ земјата избувнаа помали шумски пожари.