Германските електроенергетски компании „РВЕ“ и „Унипер“ потврдија дека првпат платиле за рускиот гас според уредбата од Москва која предвидува плаќања во рубли преку посредничка банка во Русија.
Според руската уредба од крајот на март, купувачите од „непријателските земји“ мора да отворат сметка во Гаспромбанк на која префрлаат пари во договорената валута, главно евра и долари. Банката потоа ги продава на аукција на берзата и рублите ги префрла на сметката на добавувачите на „Гаспром“.
Москва за „непријателски“ земји ги смета членките на Европската унија, САД, Швајцарија и останатите кои воведоа санкции кон Русија поради нејзината инвазија на Украина исклучувајќи ги големите руски банки од глобалниот финансиски систем.
Регулативата ги подели земјите на ЕУ. Така, Полска, Бугарија и Финска одбија да платат за рускиот гас според новите правила и „Гаспром“ во мај го прекина снабдувањето. Оваа недела руската компанија објави дека повеќе нема да испорачува гас ниту на холандската „ГасТера“, ниту на данската „Оерстед“.
Германија е голем увозник на руски гас, кој минатата година сочинуваше повеќе од половина од нејзиниот увоз на тој енергенс, а значителен дел нарачуваа токму „Унипер“ и „РВЕ“. Двете компании веќе најавија дека ќе отворат сметки во Гаспромбанк, во согласност со важечките санкции кон Русија, за да обезбедат континуирано снабдување со гас на Германија.
„Како и другите германски и европски компании, и ‘Унипер’ го смени начинот на плаќање за гас испорачан од Русија. ‘Унипер’ плаќа во евра, во согласност со новиот механизам за плаќање“, напиша компанијата во изјавата испратена по електронска пошта.
„Првата уплата беше извршена на крајот на мај. Затоа, ‘Унипер’ постапува во согласност со санкциите и може и понатаму да гарантира навремено почитување на договорот“, додаваат тие.
Плаќањето, истакнаа, било извршено во координација со германската влада и во согласност со насоките на Европската унија. Компанијата во мај најави дека првата исплата според новиот модел ќе ја изврши на крајот на месецот, но не прецизираше датум. И портпаролката на „РВЕ“ потврди дека тие префрлиле евра на сметка во Русија, отворена за плаќање гас според новиот модел.
(Фото: АП)
