Германија се стреми да започне енергетски проекти со Сенегал, рече канцеларот Олаф Шолц за време на неговото прво патување во Африка во време кога војната во Украина ги зголемува цените на енергијата и храната.
Шолц ја започна тридневната посета на Африка во Сенегал, земја која поседува милијарди кубни метри резерви гас и се очекува да стане главен производител на гас во тоа подрачје.
„Германија се обидува да ја намали зависноста од руски гас поради инвазијата на Украина, заради што почнуваме разговори со сенегалските власти за увоз на природен гас“, рече Шолц.
„Ова е прашање со кое треба сериозно да се позанимаваме“, рече тој на прес-конференција со сенегалскиот претседател Меки Сал, додавајќи дека во интерес на двете земји е да напредуваат разговорите.
Шолц посочи дека Германија е заинтересирана и за сенегалските проекти за обновлива енергија.
Сал истакна дека Сенегал е подготвен да работи на снабдување на европскиот пазар со течен природен гас, ЛНГ. Тој предвидува дека Сенегал ќе произведе 2,5 милиони тони следната година и 10 милиони тони до 2030 година.
Што се однесува до истражувањата за гас, финансирањето на проектите и други прашања, Сал рече дека ќе земе се во предвид и дека е „подготвен да соработува со Германија во овој контекст“.
Германија ги покани Сенегал, кој моментално претседава со Африканската унија, и Јужноафриканската Република да бидат гости на Самитот на Г7 што во јуни ќе се одржи во Германија.
Двете африкански земји се воздржаа од гласање за резолуцијата на Обединетите нации против рускиот напад врз Украина, кој Москва го нарекува специјална воена операција.
Како претседател на Африканската унија, Сал рече дека многу африкански земји не сакаат да изберат страна во војната, иако ја осудуваат инвазијата.
„Многу е јасно – сакаме мир. Работиме на деескалација, за прекин на огнот, за дијалог… тоа е позицијата на Африка“, рече тој.
Сал истакна дека ќе ги посети Москва и Киев во наредните недели.
Војната во Украина, која е главен снабдувач на жито и храна, предизвика прекин на снабдувањето што ги зголеми цените на храната и енергијата во Африка.
„Изразив голема загриженост на канцеларот Шолц за влијанието на војната“, рече Сал, барајќи меѓународна помош за ублажување на последиците што ги трпи Африка.
(Фото: ДВ)
