Германските власти го идентификуваа осомничениот за диверзијата на гасоводот „Северен тек“ од пред две години и по него распишаа потерница, јавија денеска германските медиуми.
Како што објавија медиумите, Главниот државен обвинител во Карлсруе издаде налог за апсење на еден Украинец, специјален нуркач, за кој постои основано сомнение дека заедно со уште двајца украински државјани во септември 2022 година извршил диверзија на двата тека на гасоводот кој низ Балтичко Море пренесува руски гас за западноевропскиот пазар.
Информациите врз основа на кои Главното државно обвинителство издало потерница се засноваат, како што понатаму наведуваат медиумите, на информации од „странски разузнавачки служби“.
Украинецот кој важи како главен осомничен до неодамна живеел во Полска, но не се знае каде моментно се наоѓа.
Тројцата осомничени, двајца мажи и една жена, во јули 2022 година, изнајмиле едрилица во германското пристаниште Росток која, како што се претпоставува, им послужила за транспорт на експлозив и опрема до местото на саботажата, недалеку од данскиот остров Борнхолм.
Германските власти одбија да ги коментираат наводите изнесени во медиумите, укажувајќи на тоа дека истрага е во тек.
Во моментов само Германија води истрага за случајот со саботажа на гасоводот „Северен тек“. Данска и Шведска во меѓувреме ги прекинаа своите истраги.
Гасоводот „Северен тек“ е симбол на германската зависност од руски гас и посебно поврзаноста во овој проект на поранешниот канцелар Герхард Шредер, кој до неодамна беше во Управниот одбор на „Северен тек“ и кој е на удар на критики поради поврзаноста со рускиот претседател Владимир Путин.
(Фото: Министерство за одбрана на Данска)
