Претседателот на Здружението на професионални војници на Германија, полковникот Андре Вистнер, вели дека би било наивно да се верува дека војната во Украина ќе заврши оваа година и оцени дека без помошта на Америка, Киев одамна ќе ја загубел.
Вистнер за „Билд“ истакна дека рускиот претседател, Владимир Путин, засега нема да отстапи од своите воени цели и ќе продолжи да се обидува да ја дестабилизира Европа.
Смета дека Путин го подготвува руското население за долгорочен системски конфликт со Западот и дека затоа НАТО и Германија мора стратешки да се усогласат за една деценија на закана.
„Мораме да продолжиме да ја поддржуваме Украина и во исто време побрзо да го опремиме самиот Бундесвер. Ова е единствениот начин да се обезбеди веродостојно одвраќање заедно со НАТО“, рече тој.
Вистнер посочи дека поради воената помош на Германија за Украина, материјалната оперативна готовност на германската артилерија продолжува да опаѓа, бидејќи залихите на оружје споро се надополнуваат.
„Во моментов во Бундесверот, од речиси 300 тенкови ‘Леопард’ само 30 отсто се во функција“, вели Вистнер, истакнувајќи дека е потребно стратешко планирање координирано на европско ниво за да се врати воената индустрија во масовно производство.
Според него, пресврт во производството ќе биде можен само ако воената индустрија во рана фаза биде информирана за тоа колку борбени тенкови, муниција и оружје ќе му бидат потребни на Бундесверот во следните две до пет години, пренесува Танјуг.
