Голема операција на Европол против рускиот незаконски имот

LinkSense.mk

Европол заедно со земјите-членки на ЕУ, со Европравда и со Фронтекс вчера почнаа операција наречена „Оскар“, насочена кон руски поединци и компании, кон кои се воведени санкции поради  војната во Украина.

„Операцијата има за цел да ги поддржи финансиските истраги во земјите-членки на ЕУ против незаконски имот во сопственост на физички и правни лица санкционирани за руската инвазија на Украина, се наведува во соопштението на Европол.

Операцијата исто така е насочена кон откривање на „непочитување на трговските и економските санкции наметнати од ЕУ“.

„Оскар“ ќе трае најмалку една година и ќе се состои од голем број различни истраги, додаваат од Европол.

Европската агенција за судска соработка Европравда ќе ја олесни размената на стратешки и оперативни информации, ќе обезбеди правна помош и поддршка и ќе ја зајакне соработката меѓу националните истражни и судски органи.

Додека Фронтекс ќе го засили надзорот на луѓето кои ја минуваат надворешната граница на ЕУ.