Силното поскапување на енергенсите и храната во мај ја донесе инфлацијата во Германија на најголема брзина во последниот речиси половина век. На повидок нема забавување, а и да има, тоа ќе биде краткорочно, оценуваат експертите…
Во мај, потрошувачките цени беа за 7,9 отсто повисоки во однос на 12 месеци претходно, соопшти Германското биро за статистика. Така, цените растеа од година во година трет месец по ред со стапка од повеќе од седум проценти, пишува магазинот Phoenix. Од април до мај, цените на мало скокнаа за 0,9 отсто. Бројките само ги потврдија прелиминарните проценки од крајот на мај.
Инфлацијата е посилна од кога било од обединувањето на Германија во 1990 година, а за споредливи бројки треба да патуваме во 1973-74 година. Тогаш, првата нафтена криза предизвика пораст на цените на горивата и ја запали инфлацијата.
Сега кризата е предизвикана од украинската војна, бидејќи Русија е огромен извозник на нафта и гас. Меѓутоа, воената неизвесност не е единствениот фактор за покачување на цените во Германија, бидејќи има данок и на јаглерод диоксид.
Од почетокот на годинава за секој тон CO2 од согорувањето на дизел, бензин, нафта за греење или гас се плаќа по 30 евра. Засега не се на повидок отстапки. Цените на големо, кои се прелеваат на малопродажбата, во мај се зголемија со стапка од 22,9 отсто на годишно ниво.
Тоа е нешто побавно отколку во април – сепак, големопродажните цени скокнаа од април до мај. Германската централна банка очекува годишна инфлација од 7,1 отсто.
