Министрите за енергетика на Европската унија, кои се состанаа вчера во Брисел, не успеаја да постигнат конечен договор за ограничување на цените на природниот гас на целата територија на Унијата, па затоа беше свикан нов вонреден состанок за понеделник, 19 декември.
Одговарајќи на повторените барања од некои земји, Европската комисија во ноември предложи ограничувања на цените како нов одговор на ЕУ на скокот на цените на гасот предизвикан од војната во Украина.
Со оглед на тоа дека членките се длабоко поделени околу деталите за предложеното ограничување, вчерашниот состанок не донесе конечна одлука, оставајќи ги министрите за енергетика на ЕУ повторно да се обидат да се договорат на 19 декември.
„Постигнавме напредок, но сè уште не сме готови. Денеска не може да се одговори на сите прашања“, изјави германскиот министер за економија, Роберт Хабек, по средбата, која траеше со часови.
Членките, вклучувајќи ги Германија, Австрија и Холандија, стравуваат дека ограничувањето на цените на гасот може да ги пренасочи многу потребните количини надвор од Европа и да го наруши функционирањето на енергетските пазари.
Други држави, Грција, Белгија, Италија и Полска, побараа горна граница за која велат дека ќе ги заштити нивните економии и жители од високите цени на енергијата.
Кој било договор и да се постигне, ќе бара од земјите постигнување компромис за техничките детали, вклучително и за висината на ограничувањето на цената, на која се применуваат договорите за гас, и заштитни мерки како што се дозволување на ЕУ веднаш да ја укине границата доколку има несакани последици.
Земјите моментно се мачат да се договорат за нивото и опсегот на ограничувањата.
Во потрага по компромис, Чешка, која претседава со ЕУ, излезе со нов предлог според кој ограничувањата би се покренале доколку цените надминат опсег од 200-220 евра за мегават/час за три до пет дена, според договорите за испораки во следниот месец во холандскиот гасен центар ТТФ.
Договорната цена, исто така, треба да биде за 35 евра повисока од референтната цена заснована на постојните проценки на цената на течен природен гас (ЛНГ).
Предлогот е под горната граница на цената од 275 евра за мегават час, предложен од Европската комисија.
Во таборите „за“ и „против“ ограничување на цените, секоја земја може да има доволно гласови за да го блокира договорот.
Франција може да се покаже како одлучувачка во завршните преговори.
На почетокот го поддржа ограничувањето на цената, но минатата недела изрази загриженост за потенцијалното влијание врз финансиските пазари. Француската министерка за животна средина, Агнес Паниер-Рунашер, вчера рече дека секое ограничување на цената треба да има за цел „да обезбеди стабилност на финансиските пазари“.
Унијата оваа година веќе се согласи за итни енергетски мерки, вклучувајќи ги и барањата за складирање гас.
Исходот од расправата за ограничување на цената може да одреди и други политики, вклучително и побрзо издавање дозволи за проекти за обновлива енергија.
(Фото: „Алијанса“)
