Листа со 13 барања која во петокот му беше врачена на Катар, може да ја извлече оваа држава од изолацијата во која ја ставија арапските земји, обвинувајќи ја дека го поддржува и финансира тероризмот.
Кон барањата има два услова: Доха да го исполни се она што се бара од неа и одобрувањето да не трае подолго од десет дена.
Тоа е рокот кој и го дале Саудиска Арабија, Соединетите Арапски Емирати, Бахреин и Египет, а барањата како посредник на властите во Катар во петокот им го предадоа официјални лица од Кувајт.
Првото барање се однесува на катарската телевизија Ал Џезаира и нејзините подружници Араби 21, Рашд, Ал Араби ал Џадид и Мидл ист ај, на кои Доха треба да стави катанец.
Египет и Саудиска Арабија одамна недвосмислено покажаа дека Ал Џезаира им е трн во окото. Од Катар се бара да ги „прекине дипломатските односи со Иран и воената соработка со Турција, како врските со терористичките организации“.
Арапските земји бараат Доха да ги протера припадниците на иранската Револуционерна гарда, да ги затвори своите дипломатски претставништва во Иран. Со Техеран треба да прекине не само дипломатската, туку каква било врска, со посебен акцент на воената соработка.
Арапските земји бараат и тоа Катар да плати надомест за загубени животи и надомест за материјални загуби кои ги предизвикала катастарската политика во изминатите години. Катар мора да престане да ги финансира сите екстремистички групи кои САД ги означиле како терористички, вклучувајќи ја Исламска држава, Муслиманско братство, либанската Хезболах и огранокот на Ал Каеда во Сирија некогаш познат како Нусра фронт.
Ако Катар се согласи на барањата, листата ќе биде ревидирана еднаш месечно во текот на првата година, а потоа на секои три месеци во втората година. Спроведувањето на барањата ќе биде надгледувано во следните десет години.
Западните агенции истакнуваат дека не е јасно што ќе се случи ако Катар не ги прифати сите тие барања. За сега нема официјален одговор од Доха, но шефот на дипломатијата Мухамед бин Абдулрахман ал Гани, претходно нагласи дека нема да има никакви преговори со арапските земји додека не бидат укинати казнетите мерки.
Што се однесува на укинувањето на Ал Џезаира, Ал Гани тогаш порача дека „Катар тоа никогаш нема да го исполни“.
Заливските земји, а особено Саудиска Арабија, одамна ја обвинуваат Ал Џезаира, најгледаната арапска сателитска мрежа на англиски јазик, сека креира платформа од која дејствуваат исламистите и која го охрабрува екстремизмот. Во изјава за Би-Би-Си, Џамал ал Сајал, новинар и портпарол на Ал Џезаира вели: „Фактот дека обвинувањата најмногу стигнуваат од земјите кои се директно вклучени или во основањето или во поттикнувањето на работата на екстремните исламистички организации, е повеќе од иронична“.
