Иран ќе ги казнува жените за кршење на исламските кодекси на облекување, изјави денеска шефот на иранското правосудство, Голамхусеин Мохсени Еџеи, за новинската агенција ИРНА, потврдувајќи дека законот ќе остане во сила и после неколкумесечните протести кои беа задушени со крв.
„Вадењето на хиџабот е еднакво на покажување непријателство кон Исламската Република и нејзините вредности. Луѓето кои ќе се одлучат на таков ненормален чин ќе бидат казнети“, рече Еџеи.
„Со помош на судската и извршната власт, властите ќе ги искористат сите расположливи средства за да се справат со луѓето кои соработуваат со непријателот и го прават овој грев кој му штети на јавниот ред“, додаде тој.
Смртта на иранската Курдка Махса Амини на 16 септември во притвор поради „несоодветно и непрописно облекување“ предизвика протести низ целата земја, што претставуваше најголем предизвик за иранските власти од 1979 година.
Безбедносните сили во голема мера ги задушија немирите во последнитве недели.
