По повод Меѓународниот ден на слободата на медиумите, новинарот Томислав Кежаровски, преку видео обраќање потсетува на важноста од слободното изразување на новинарите и медиумите.
Тој вели дека сака да потсети на владеењето на ВМРО-ДПМНЕ, кога, како што рече, гласот на новинарите беше стишуван, спречуван и цензуриран, освен за оние кои беа блиски до тогашните структури на власта.
„Јас лично бев жртва на линчот кој го спроведуваше таа власт кон сите оние кои укажуваа на недостатоците во нивното работење. Не успеав да ја избегнам казната, напротив, и покрај мојата невиност, поминав низ долга, тешка и агонична животна епизода, истакнува Кежаровски.
Според него, новинарите се и треба да бидат коректив на власта во една држава, а новинарското перо најсилното оружје против оние кои ќе заборават дека ја имаат власта за да ги застапуваат интересите на својот народ, а не своите лични интереси.
„Изодевме долг пат до ова на што сме денес. Не велам дека нема недостатоци. И натаму треба посветено да работиме во интерес на слободното изразување на медиумските работници и целосна независност на медиумите. Конечно, ние сме на добар пат да изградиме општество со независни и слободни медиуми, да поставиме камен-темелник на вистинска демократија и систем на здраво владеење, порачува Кежаровски во неговото видео обраќање.
