Постарите жители на Пекинг набавуваат во се поголеми количини зелка, откако владата ги советуваше луѓето да имаат доволно намирници дома во случај на потреба.
Луѓето со години наназад на почетокот на ноември купуваа зелки, кои со месеци можат да се чуваат свежи и кои нашироко се користат во домашната кујна за да издржат низ ладната зима.
Кинеската влада минатата недела ги советуваше семејствата да се снабдат со потребни намирници откако излегоа првите прогнози за снежни врнежи. Веќе од рано утро се формираа големи редови пред супермаркетите во центарот на Пекинг.
„Секоја година во ова време се зголемува продажбата на зелка, но откако владата испрати соопштение, сите побрзаа да купат уште повеќе“, рече Ји Јинжи, земјоделец, продавач на зеленчук на големо.
Супермаркетите ја ограничија продажбата на само три зелки на едно лице, но и тогаш купувачите кои доаѓаа после 9 часот наутро си одеа со празни раце.
Светлозелената зелка, позната како кинеска зелка или Напа зелка, некогаш во поголеми количини се чуваше по дворовите, во ходниците во станбените згради или дури и во импровизирани магацини под земја, а луѓето се натпреваруваа кој ќе има поголема количина складирана зелка.
Ниските температури со месеци ги одржуваа зелките во добра состојба.
Количините зелка се намалија со текот на годините со појавата на софистицирана логистика која овозможи брз и лесен транспорт на свеж зеленчук по Кина во текот на целата година. Кон тоа придонесе и фактот дека семејствата се повеќе живеат во мали станови во кули, а не повеќе во куќи. Но, традицијата остана.
„Ова е пекингшки обичај“, изјави жена напуштајќи го супермаркетот „Вумарт“ со три зелки во рацете.
Купувачите во „Вумарт“ истакнале дека плаќаат околу три пати повеќе отколку лани, односно 1 јуан за половина килограм. Тие велат дека се плашат дека ако не се снабдат со зелка сега, цената во текот на зимата ќе скокне двојно повеќе.
„Можете да ја чувате зелката два-три месеци. Ставете ја надвор и прекријте ја со некое ќебе или завиткајте ја со лист од весник“, им изјавиле двајца пензионери на новинарите.
Зголемената активност за купување намирници, особено зелка, дојде после советот на кинеската влада за набавка на основни залихи. Министерството за трговија ги поттикна луѓето да се снабдат со храна и основни намирници пред зимата и после неодамнешниот скок на цените на зеленчукот во пандемијата.
(Фото: ЕПА)
