„Коалицијата „За живот во Македонија“, заслужува да формира нова Влада во Македонија. Таква е волјата на над 612.000 граѓани на Македонија, кои избраа промени и крај на режимот на Никола Груевски и неговата Влада“, велат од Либерално-демократската партија.
Согласно Уставот, Ѓорге Иванов треба мандатот да му го даде на лидерот на коалицијата „За живот во Македонија“, Зоран Заев да го состави новото парламентарно мнозинство, сметаат од партијата.
Во Македонија итно мора да се формира реформска влада. Новата Влада ќе му даде ветер во грбот и на Специјалното јавно обвинителство да гo расчисти скандалот со прислушувањето и направениот криминал. Во оваа држава мора се врати владеењето на правото, да се реформира правосудниот систем и, еднаш за секогаш, да се искорени груевизмот што Македонија ја претвори од демократија во хибриден режим, Горан Милевски.
Горан Милевски, претседател на Либерално-демократската партија вели дека Иванов не смее да оди спротивно на волјата на граѓаните. Недозволиво било тој да се однесувал сервилно кон Груевски, да тактизира, да се сокрива и да се обидува да ја продлабочува политичката криза во државата.
Првиот човек на ЛДП додаде дека партијата ќе биде дел од новата Влада предводена од Зоран Заев и со тоа ќе даде свој придонес во спроведувањето на итните реформи предвидени во извештаите на Прибе и на Европската комисија, како и реформите утврдени согласно Договорот од Пржино.
