Освојувачот на Африканскиот куп на нации беше познат дури после изведувањето пенали. Сенегал во финалето го победи Египет на пенали со 4:2, откако во регуларниот дел, а и по двете продолженија од по 15 минути резултатот беше нерешен – 0:0. Ова е прва титула за Сенегалците во историјата на ова натпреварување.
Веќе во четвртата минута Мохаме Абделмонем собори играч во шеснаесетникот. Изведувач на најстрогата казна беше Садио Мане. Асот на Ливерпул шутираше по средината на голот, Габаски му ја прочита намерата и топката отиде во корнер.
Египет имаше добра прилика во 43. минута. Салах шутираше добро, а Едуард Манди уште подобро одбрани.
Следната добра можност ја видовме во 92. минута кога Бамба Диенг шутираше од работ на шеснаесетникот, а Габаски беше сигурен.
Диенг беше најзабележан во продолженијата. Првата шанса ја имаше во 100. минута, неговиот удар со глава го одбрани чуварот на мрежата на противникот, а петнаесет минути подоцна шутираше од работ на шеснаесетникот, но ништо и од тоа.
Првиот пенал за Сенегал го реализираше Калиду Кулибали, а за Египет прецизен беше Зизо. Дијало потоа погоди за Сенегалците, а Абделомонем ја погоди стативата. Сенегалецот Буна Сар возврати со промашување, а Египјанецот Хамди израмни на 2:2.
Диенг потоа постигна гол за Сенегал, но Египќанецот Лашин беше запрен со одбраната на Едуард Менди. Садио Мане повторно ја презеде одговорноста. Овој пат погоди и му донесе на Сенегал континентална титула.
