Претседателот на Владата на Република Чешка, Андреј Бабиш на билатералната средба со премиерот Зоран Заев на маргините на 8. Самит на шефови на влади од земјите на ЦИЕ и НР Кина од процесот на соработка 16+1, изрази недвосмислена поддршката за почеток на преговорите на нашата земја со ЕУ.
„Во однос на нашите евроатлантски интеграции и претстојната важна одлука за почеток на преговорите со Европската Унија, од страна на премиерот Бабиш беше изразено уверување дека Република Чешка ќе и ја пружи потребната поддршка и помош на нашата земја да се донесе позитивна одлука за почеток на преговорите, наведува прес-службата на Владата на РСМ.
Двајцата премиери се согласиле дека треба да се искористи и потенцијалот за зголемување на економската соработка.
Целта на средбата беше да се афиримираат воспоставените добри билатерални односи и да се отворат нови полиња на соработка во областа на економијата, евроатлантските интеграци на нашата земја, како и во областа на безбедноста и внатрешните работи. Во тој правец премиерот Заев ја спомна неодамнешната официјална посета на вицепремиерот на Владата на Чешка, Јан Хамачек на Република Северна Македонија како важен поттик за унапредување на взаемната соработка.
„Оваа година навршуваме вкупно 25 години од воспоставување дипломатски односи помеѓу нашите две земји. Република Чешка претставува голем пријател и земја поддржувач. Имаме голем потенцијал да ја зголемиме нашата економска соработка. Трговската размена помеѓу нашите две земји минатата година се зголемила за 10 отсто. Чешките компании се добредојдени и ќе добијат поддршка и третман од државата еднакво како и домашните доколку се одлучат да инвестираат во Република Северна Македонија, нагласи премиерот Заев.
