Папата Лав вчера е опериран при што му беше отстранет мал израсток на едното белодробно крило. Операцијата помина добро и според однапред утврден план, објави Ватикан.
Ова е првиот сериозен здравствен проблем на папата во 17-те месеци од неговиот понтификат.
Папата Лав (71), беше подложен на процедура во болницата „Џемели“ во Рим за отстранување на мал јазол за кој самиот рече дека бил навремено забележан за време на неодамнешен рутински преглед.
„Операцијата беше завршена успешно, на време и според планот“, се наведува во краткото соопштение на Ватикан објавено доцна вчера поладнево, во кое не се дадени дополнителни детали.
Ватикан претходно објави дека процедурата ја водеше раководителот на Одделот за торакална хирургија во болницата „Џемели“, професор Стефано Маргаритора.
Папата го напушти Ватикан пред операцијата кратко пред 13 часот по локално време и беше виден како мавта од задното седиште на црн џип додека конвојот се движеше околу девет километри северно од Ватикан кон болницата „Џемели“.
По пристигнувањето во болницата, тој се ракуваше со неколку службени лица, помина покрај толпа граѓани кои му посакуваа брзо закрепнување – од кои некои извикуваа „Аугури“ (најдобри желби) – и влезе низ главниот влез.
Според медицинските експерти, операцијата треба да помогне да се утврди дали израстокот е малиген и каков понатамошен третман е потребен. Во вечерното соопштение, Ватикан не прецизираше кои претреси биле спроведени на јазолот.
Ватикан изјави дека се очекува Папата да се опоравува во болницата околу една недела. Сите негови јавни настани се откажани до 20 октомври.
Фото: МИА
