Според Евростат, статистичката агенција на Европската унија, речиси четвртина од сите жители на Германија не можат да си дозволат дури ни неколку дена одење од дома, а најтешко се погодени семејствата со еден родител и поголемите семејства.
Податоците кои ги побара левичарската пратеничка Сара Вагенкнехт откриваат дека 22,6% немале средства за еднонеделно патување во 2023 година. Кај семејствата со самохрани родители, уделот пораснал на 43,2%, а во семејствата со двајца возрасни и три или повеќе деца на 31,3.
Уделот на населението што не може да си дозволи еднонеделно патување е зголемен за 0,4 процентни поени на годишно ниво.
Отприлика 30,4% самци и 16,8% парови не можат да си дозволат патување од ваков вид, при што и двете бројки се малку зголемени во однос на годината пред тоа.
Вагенкнехт, која основаше своја популистичка партија на почетокот на оваа година, откако се одвои од тврдо левичарската Ди Линке, ги опиша бројките како срамни.
„Речиси една четвртина не може да земе една недела одмор“, рече таа.
Левичарската лидерка, кој порасна во комунистичка Источна Германија, а подоцна се појави како гласноговорник на левицата од висок профил во Германија, се нафрли на коалицијата на левиот центар на канцеларот Олаф Шолц, обвинувајќи ја дека осиромашила милиони Германци.
„Потребна ни е голема промена во економската и социјалната политика“, рече таа.
Нејзиниот Сојуз на Сара Вагенкнехт (БСВ) моментално има околу 6% од гласовите на национално ниво.
Во последните години, податоците на Еуростат покажуваат мала промена во уделот на жителите на Германија кои не можат да одат на еднонеделно патување. Во 2020 година, бројката беше 22,4%, во 2021 година се намали на 19,9%, па се зголеми на 22,2% во 2022-ра и на 22,6% минатата година.
