Член на Алтернатива за Германија (АфД) победи на изборите за градоначалник на еден мал град на истокот на земјата, со што донесе нова победа на таа партија од крајната десница.
Ролф Вајганд вчера освои 59,4 отсто од гласовите, лесно победувајќи ги другите двајца кандидати во Гросширма, град кој се наоѓа западно од Дрезден.
Вајганд е претставник на АфД во покраинскиот парламент на Саксонија. На изборите за градоначалник се кандидираше како „индивидуален кандидат“, што значи дека АфД официјално не го предложила.
Изборите во градот со 5.500 жители станаа неопходни по ненадејната смрт на долгогодишниот градоначалник Волкмар Шрајтер на крајот на минатата година.
Вајганд се кандидираше и за градоначалник на претходните избори, но беше поразен од Шрајтер, член на Слободните демократи.
Во градот Пирна, на околу 60 километри источно од Гросширма, Тим Лохнер ја презеде функцијата градоначалник. Лохнер не е член на АфД, но партијата го предложи за избор.
Главниот политичка одредница на АфД е тврдокорниот антиимиграциски став, а партијата профитира од зголемената загриженост на многу германски гласачи заради се поголемиот број на баратели на азил во земјата.
Зголемувањето на рејтингот на АфД на анкетите во текот на изминатата година предизвика вознемиреност меѓу главните германски партии и доведе до жестока општествена расправа.
Илјадници луѓе се приклучија на протестите против екстремизмот низ Германија во последните месеци.
(Фото: Патрик Плеул / ДПА – АФП)
