Невработеноста ќе се намалува реално и тоа ќе го чувствуваат сите граѓани, а не декларативно како што досега правеше ВМРО-ДПМНЕ, преку нарачани бројки од контролирани институции, бришење од евиденција на невработените лица и иселувањето на младото работоспособно население надвор од државата, реагираат од СДСМ на прес-конференцијата на ВМРО-ДПМНЕ за намалувањето на невработеноста.
Оттаму додаваат дека е нелогично да се намалува стапката на невработеност во услови кога економијата стагнирала поради блокадите и опструкциите на ВМРО-ДПМНЕ на демократските процеси за формирање на новата Влада. Потребен е економски раст што ќе ги апсорбира новотворените работни места.
Новата реформска Влада предводена од СДСМ има капацитет, знаење и умешност преку поддршка на домашните фирми и одговорно менаџирање со ресурсите што ги поседува земјата да обезбеди тој реален економски раст за реални работни места и вистински пад на невработеноста, се вели во соопштението од СДСМ.
Во него се додава дека заложбите на новата реформска Влада предводена од СДСМ се во насока на враќање на институциите во служба на граѓаните.
Сите државни институции, истакнуваат од оваа партија, ќе работат транспарентно и објективно и ќе профункционираат во служба и интерес на граѓаните на Р. Македонија.
