Реконструкцијата на катедралата Нотр Дам во Париз се одвива доволно брзо за да овозможи нејзино повторно отворање за посетителите и верниците на крајот на 2024 година, помалку од шест години откако пожарот го уништи покривот на градбата, соопштија француските власти.
„Кулата на катедралата, која се урна во пожарот, годинава повторно ќе почне постепено да се појавува како силен сигнал за нејзино оживување“, изјави претставникот на војската задолжен за проектот, генерал Жан-Луј Жоржелин.
„Враќањето на кулата на небото на Париз ќе биде, според мое мислење, симбол дека победуваме, во ‘Битката кај Нотр Дам“, рече тој за Асошиетед прес.
Самата реконструкција почна минатата година, после повеќе од две години работа на тоа споменикот да биде доволно стабилен и безбеден за занаетчиите да почнат да го обновуваат.
Властите одлучија да го обноват споменикот од 12 век, ремек-делото на готската архитектура, како што беше порано.
Тоа вклучува повторното создавање на кулата висока 93 метри, која во 19 век ја создаде архитектот Ежен-Емануел Виол-ле-Дик.
Во меѓувреме, бесплатна изложба под називот „Нотр-Дам: Во срцето на градилиштето“ ќе биде отворена за посетителите денеска во подземен објект пред катедралата.На изложбата ќе бидат претставени тековните работи на локацијата, како и некои остатоци од пожарот и уметнички дела од катедралата.
Генералот Жоржлин најави дека катедралата повторно ќе биде отворена во декември 2024 година, во склад со целта што ја постави претседателот Емануел Макрон непосредно после пожарот.
„Секој ден во главниот град и низ целата земја, околу 1.000 луѓе работат на обновување на Нотр Дам“, рече Жоржлин.
Филип Јост, генерален директор на владината агенција која ја надгледува реконструкцијата, вели дека резултатот „ќе биде верен на оригиналната архитектура“ затоа што, истакнува, се држат до формите што недостасуваат на катедралата“ и затоа што се држат до материјалите и методите на изградба од средниот век.
Пожарот во катедралата Нотр Дам избувна на 15 април 2019 година во доцните попладневни часови под покривот на катедралата, а беше изгаснат 15 часа подоцна.
Во пожарот изгореа покривот и кулата на покривот, а внатрешноста на катедралата, горните ѕидови и прозорците беа тешко оштетени. После неполни 12 часа по избувнувањето на пожарот, беа собрани повеќе од 900 милиони евра донации за обнова на катедралата од целиот свет.
