Лидерот на лабуристите, Крис Хипкинс, положи заклетва за премиер на Нов Зеланд на службена церемонија, и ја замени Џасинда Ардерн која минатата недела неочекувано поднесе оставка.
Лабуристичката партија во неделата го избра поранешниот министер за полиција задолжен за одговор на Ковид-19, 44-годишниот Хипкинс, да ја води партијата и државата.
Тоа се случи по изненадувачката оставка на 42-годишната Ардерн, која рече дека „повеќе нема сила“ да управува со земјата.
Кога Ардерн заминуваше, во дворот на парламентот се собраа стотици луѓе.
Поранешната премиерка го прегрнуваше од ред секој пратеник, а многумина беа емотивни.
Таа потоа отиде во резиденцијата на претставникот на кралот Чарлс на Нов Зеланд, генералната гувернерка Синди Киро и и ја поднесе својата оставка.
Хипкинс и неговата заменичка Кармел Сепулони после тоа дадоа заклетва на церемонија која траеше неколку минути.
Хипкинс денеска ќе го одржи првиот состанок на владата.
Познат како „Чипи“, Хипкинс им е добро познат на Новозеланѓаните по неговата способност во борбата против Ковид-19, иако призна некои грешки во пандемијата и се соочува со тешка битка да ја задржи власта на парламентарните избори во октомври.
Според анкетата на „1 Њус“ од декември, поддршката за лабуристите падна од 40 отсто на 33 отсто на почетокот на 2022 година, што значи дека лабуристите не би можеле да обезбедат мнозинство дури и со традиционалниот коалициски партнер Зелената партија, која ја поддржуваат девет отсто од гласачите. Од падот на поддршката за лабуристите профитираше опозициската Национална партија.
(Фото: АФП)
