Министерот за земјоделство на Украина вчера понуди оставка бидејќи се соочува со обвинувања за вмешаност во незаконско стекнување на државно земјиште вредно 7 милиони долари.
Микола Солски (44) беше во средиштето на напорите Украина да ја одржи својата индустрија за жито, додека руската сеопфатна инвазија ги блокираше црноморските извозни рути, ги затрупа полињата со мини и го зазеде обработливото земјиште.
Солски ги негира обвиненијата за кои обвинителите велат дека се однесуваат на настани од 2017 до 2021 година, пред да стане министер за земјоделство во март 2022 година.
Се очекува судот вечерва да одлучи дали ќе го притвори.
Обвинителите на сослушувањето рекоа дека обвиненијата против него предвидуваат казна затвор до 12 години.
Националното биро за борба против корупцијата соопшти дека обвиненијата се однесуваат на стекнување на државно земјиште вредно 7,35 милиони долари и обид за стекнување на земјиште вредно 4,79 милиони долари.
Според наводната шема, земјиштето незаконски било одземено од две државни компании и пренесено на воените ветерани под услов да го дадат под закуп на некои приватни компании, соопштија обвинителите.
Адвокатот на министерот вчера во судот, пред истражниот судија изјавил дека неговиот клиент немал корист од таквата шема.
Солски е првиот познат министер кој, откако претседател е Володимир Зеленски, е осомничен за корупција.
„Оставка ќе биде разгледана на една од следните седници на украинскиот парламент“, напиша претседателот на парламентот, Руслан Стефанчук, на Телеграм.
„Доколку Врховната Рада (парламентот) одлучи да ја прифати мојата оставка, ќе бидам благодарен за таквата одлука. Ако, пак, одлучи дека треба да продолжам да работам, ќе продолжам да работам“, напиша Солски на Телеграм.
(Фото: Кензо Трибуилард – АФП)
