Во Германија се воведуваат строги мерки за забавување на бранот инфекции со Ковид-19 предизвикан од варијантата „омикрон“.
Од денеска се во сила ограничувања за собири во затворени простори и на отворено, а во неколку сојузни држави се затвараат теретаните, спортски сали, базени и ноќни клубови. Рестораните и кафулињата ќе работат пократко.
Новогодишниот огномет, кој традиционално се одржува на отворено во повеќето германски градови, откажан е втора година по ред.
Ограничувања на приватни собири
Се воведуваат ограничувања и за приватни собири во оние делови од земјата каде ова правило не е воведено пред Божиќ. Забранети се собири на повеќе од десет лица, како на отворено, така и во затворени простории, а во оваа бројка не се вклучени децата помлади од 14 години.
Сепак, оваа мерка важи само за оние кои се вакцинирани или ја прележале инфекцијата со Ковид-19. На оние кои не се вакцинирани дозволено им е да се дружат со најмногу две лица од други домаќинства.
Останува на сила обврската за носење маски, која беше воведена пред речиси една година, во продавниците и јавниот превоз, како и покажување потврда за вакцинација.
Би можело да има до 700.000 случаи на ден
Досега, целосно се вакцинирани речиси 71% од Германците, додека нешто помалку од 36% примиле бустер доза.
Пред Божиќ, канцеларот Олаф Шолц постави цел до 7 јануари да се вакцинира 80 отсто од населението. Но, Владата денеска соопшти дека тоа ќе биде тешко остварливо и дека ќе се обиде планот да го спроведе до крајот на јануари.
Германскиот министер за здравство, Карл Лајтербах, повеќе пати рече дека внимателно ги следи случувањата во Велика Британија и дека разговара со тамошниот колега за да ги следи случувањата во земјата каде што „омикрон“ се појави две до три недели порано отколку во Германија.
Варијантата „омикрон“ досега е забележана во сите 16 германски покраини, но сè уште не станала доминантна.
Експертите предупредуваат дека Германија може да има до 700.000 случаи на зарази дневно, што може да резултира со нов локдаун.
На сила остануваат и претходно донесените мерки
Вирологот Кристијан Дростен од болницата „Шарите“ во Берлин вели дека „прашање е дали овие мерки ќе функционираат“. Ако не функционираат, тој предложи да се даде поголема слобода на граѓаните кои примиле бустер доза и имаат поголема заштита од оние кои биле двапати вакцинирани.
Маркус Содер, лидерот на Баварија, смета дека да се намали периодот на изолација на пет дена во случај лицето да нема симптоми бидејќи во спротивно може да има проблеми со функционирањето на системот.
На сила остануваат донесените мерки за ограничување на пристапот до работното место и јавниот превоз само за вакцинирани лица, оние кои имале коронавирус или оние кои се негативни на тестот, како и мерките за пристап во објектите за малопродажба само за вакцинирани лица или оние кои прележале ковид, при што во тоа не се сметаат маркетите и аптеките.
Останува на сила и забраната за продажба на пиротехнички средства.
(Фото: ЕПА)
