Хрватска блокира имот на Руски државјани: Запленети вили, шуми…

LinkSense.mk

Хрватска почна да го блокира имотот на санкционираните Руси, пишува Вечерњи лист, наведувајќи дека се конфискувани руски куќи, викендички и шуми, а блокирани се и сметки на фирми.

Врз основа на европските санкции против Русија, Хрватска го замрзнала имотот на сопругата и сестрата на Алишер Усманов, еден од најбогатите Руси, на Пељешац, а решенијата веќе се објавени во јавните регистри.

Се чини дека хрватските власти во лоцирањето на руските имоти во голема мера се воделе по пишувањето на порталот „Остро“ (Oštro), кој е единствениот од Хрватска кој учествува во меѓународниот новинарски проект Russian Asset Tracker, и кој во рамки на таа соработка открива и бележи имоти на луѓе блиски до Владимир Путин.

Имено, порталот „Остро“ откри дека зад офшор компаниите и хрватските фирми со ограничена одговорност, кои се запишани како сопственици на спорниот недвижен имот на Пељешац, се кријат Ирина Винер-Усманова, сопругата на Алишер Усманов, и Гуљбахор Исмаилова, сестра на истиот олигарх.

Ирина Винер-Усманова е прославен руски тренер по ритмичка гимнастика, а Пељешац, наводно, го посетувала уште во времето на СССР и СФРЈ, па и останал во убаво сеќавање, заради што пред 15 години го замолила својот богат сопруг да и купи куќа и хотел во Оребиќ, во кој на подготовки би носела ритмички гимнастичари. Блокадата на имотот во нејзиниот случај се однесува на фирмата Кисик д.о.о., а блокадата на имотот поврзан со сестрата на Алишер Усманов се однесува на Сутвид, на северната страна на средината на полуостровот Пељешац.

Освен блокадата на овие имоти веднаш до морето, на Пељешац, кои се поврзани со олигархот Усманов, „Вечерњи лист“ најде докази и за блокада на куќа во Мали Лошињ, во сопственост на фирма во која член на управен одгор е Маја Токарева. Таа е ќерка на Николај Токарев, претседател на Транснефт, кој, исто така, е под санкции на Европската унија.

Во судскиот регистар за компании и во Катастарот засега нема индиции дека Хрватска има намера да ја блокира вилата на Виктор Векселберг, уште еден руски олигарх кој на времето се фалел со куќа во Лозица, атрактивен дел на Дубровник.

Исто така, нема индиции дека врз основа на санкции било што се случува во Шипан, каде пријатели на Путин ја реновирале вилата Катино и уредиле огромен имот, а Вечерњи лист на почетокот на март цитираше информиран, неименуван извор кој тврди дека таа инвестицијата е изградена за Дмитриј Медведев како таен вистински сопственик.