Ѓоковиќ триумфално го почна завршниот Мастерс

Српскиот тенисер Новак Ѓоковиќ го победи денеска осмиот тенисер на светот, Матео Беретини, на почетокот на завршниот Мастерс турнир во Лондон со 2:0 во сетови (6:2, 6:1), после еден час и четири минути игра.

Ѓоковиќ супериорно тргна по шестиот пехар во АТП финалето и шестиот трофеј за најдобар во годината. На стартот на завршниот турнир во „О2 арената“ речиси ниеден момент не му даде на дебитантот на оваа манифестација, Италијанецот Беретини, да диши. Тој јасно им даде до знаење на останатите ривали што единствено го интересира во текот на престојот во Лондон.

После лесниот ритам на српскиот тенисер и испитувањето на силите во воведниот дел од првиот сет, Новак од петиот гем го стави менувачот во поголема брзина. Освои гем на свој сервис за 3:2, а потоа направи брејк со кој и практично го „прекрши“ мечот.

Разликата во квалитетот беше се поочигледна како течеше дуелот, дури и кога младиот Италијанец на половина на вториот сет успеа да направи брејк. Но и пред тоа краткотрајно опуштање на Ѓоковиќ, кој претходно стигна до 4:0, публиката се прашуваше само каков ќе биде конечниот резултат.

А, Новак секој пат, освен во 2017 година кога го мачеше повредата, од теренот во „О2 арената“ кој важи за исклучително брз, во четири наврати излегуваше со пехарот.