– Новоизбраниот претседател на САД, Џо Бајден го повикал главниот американски инфектолог Ентони Фаучи да продолжи да ја извршува својата работа и да биде главен медицински советник во тимот на новата администрација за борба против Ковид-19.
– Го прашав да остане на истата функција која ја извршувал за последните неколку претседатели и му понудив да биде мој главен медицински советник, како и дел од тимот за борба против коронавирусот, истакна Бајден, кој со новата администрација стапува на должност на 20 јануари.
Тој нагласи дека ќе се вакцинира јавно кога Фаучи ќе каже дека вакцината е сигурна.
– Важно е да им се објасни на американските граѓани дека е сигурна, изјави идниот претседател на САД.
Бајден додаде дека штом ќе ја преземе функцијата ќе издаде уредба за задолжително носење маски во сојузните служби и во јавниот превоз меѓу државите, како што се авионите и автобусите.
– Ќе ги замолам граѓаните 100 дена да носат маски. Не засекогаш, туку само 100 дена, нагласи Бајден.
