– По 12 дена бојкот, кој го почнаа на првиот ден од второто полугодие, матурантите организирани од Сојузот на средношколци денеска се враќаат на настава. Генералното собрание на Сојузот во четвртокот донесе одлука да го стави во мирување бојкотот и да се почека Парламентот да најде решение, откако пратеничката група на ВМРО-ДПМНЕ поднесе Предлог-закон за измени и дополнување на Законот за средно образоание.
Минатата недела претставници на Сојузот имаа средби со сите пратенички групи и очекуваат дека ќе биде поддржан предлогот за измени на Законот, со што ќе се исполни нивното барања за скратување на државната матура и наместо по четири да полагаат испити по два предмета – мајчин јазик и предмет од областа која матурантот планира да ја студира.
Претседателот на Средношколски сојуз Бленди Ходаи за МИА потврди дека матурантите кои бојкотираа денеска ќе се вратат на часови. Рече дека до крајот на февруари ќе ја следаат наставата и ќе чекаат Собранието да го прифати и изгласа нивното барање, а ако тоа не се случи најави дека ќе постават шатори пред Министерството за образование и наука.
-Се враќаме на настава за да им оставиме простор на пратениците да најдат решение.Чекаме Комисијата за образование, наука и спорт да го разгледа Предлог-законот. По средбите што ги имавме во Собранието, Сојузот на средношколци е сигурен дека има поддршка од повеќе од 70 пратеници. Ако не се прифатат и гласаат нашите барања до крајот на месецов, ние ќе почнеме да кампираме пред МОН. Нашиот бојкот e последица на немањето слух за нашите проблеми, укажувања, аргументи и конкретни предлози за изменување на годинашната државна матура. Сојузот им остава можност и време на институциите да ги прифатат и спроведат нашите барања, изјави Ходаи.
Предлогот за измени и дополнување на Законот за средно образование, опозициската ВМРО-ДПМНЕ го поднесе во Собранието минатиот понеделник и ги повика останатите пратенички групи да го поддржат за да им излезат во пресрет на матурантите.
– Со оглед на сите настанати околности како последица на КОВИД-19 пандемијата, со оглед на фактот дека учебната 2020/2021 година почна со еден месец задоцнување, времетраењето на училишниот час од 30 минути, скратените наставни програми, немањето можност за вистинска пракса, немањето технички услови кај дел од учениците итн., сметаме дека овој дел може да се регулира со дополнување на Законот за средно образование, каде ќе се дефинира бројот на предмети како и времетраењето на важноста на овој Закон, наведе пратеничката група на ВМРО-ДПМНЕ по доставувањето на Предлог-законот
Министерството за образование и наука не отстапува од актуелниот концепт за државна матура и за време на бојкотот постојано укажуваше дека измени на концептот не може да се прават во од, а нов ќе има за наредната учебна година, поканувајќи ги и претставниците на Средношколскиот сојуз да учествуваат во неговото подготвување.
Ставот на МОН е дека има и законска обврска да овозможи полагање на државната матура, зашто над 14 илјади матуранти во законскиот рок (крајот на декември) веќе се пријавиле за државна матура и ги избрале предметите по кои ќе бидат тестирани.
– Не гледам како не би го испочитувале законот кога ниту имаме вонредна состојба, ниту имаме можност на владини седници да донесуваме вакви одлуки. Законот е јасен и дециден за спроведување на државната матура зашто таа е услов за запишување во високото образиование. Сите кои не сакаат да ја полагаат, може да полагаат училишна матура со два предмета и може да полагаат стручен испит во стручните училишта, и на тој начин да го заокружат своето средно образование. Тоа е задолжително во нашата држава, а државната матура е избор, изјави министерката Мила Царовска одговарајќи на новинарски прашања по поднесениот предлог да се измени Законот за оваа генерација матуранти.
Државниот испитен центар во ноември ги соопшти термините за испитите по трите екстерни предмети (од 29 мај до 14 јуни 2021), а покрај нив, матурантите треба да полагаат уште еден интерен предмет и да изработат проектна задача.
