Штетите од катастрофалните поплави во Словенија ќе достигнат неколку милијарди евра, изјави вчера премиерот Роберт Голоб.
Најлошите поплави досега во Словенија убија шест лица, однесоа куќи и оставија села во урнатини.
Обилни дождови со денови паѓаа во околу две третини од земјата, уништувајќи згради и мостови.
„Штетата ќе изнесува неколку милијарди евра“, ги изнесе премиерот последните проценки во програмата на јавната телевизија.
Според неговите зборови, за ефикасна рехабилитација ќе биде потребно „да се направи се што може да се направи“ и да се добијат што повеќе средства од европските фондови и помош од странство.
Голоб најави дека владата на денешната седница ќе донесе пакет помош за директно погодените.
„Сакаме на луѓето денес да им го покажеме решението“, рече премиерот и додаде дека времето за акција не треба да се брои со месеци и години, туку со денови и недели.
Неопходно е да се врати довербата на луѓето во државата и иднината“, посочи тој.
Илјадници луѓе се евакуирани од своите домови низ северозападна и централна Словенија, а армијата, пожарникарите и спасувачите се обидуваат да ги ослободат останатите и да ги расчистат улиците.
Од петокот до сега загинаа шест луѓе, вклучително и двајца Холанѓани за кои се верува дека биле погодени од гром.
Словенечката Агенција за животна средина објави дека поплавите вчера почнале да се повлекуваат, но дека некои области сè уште се отсечени.
Европската унија понуди тешки машини и инженерски единици, а Словенија од НАТО побара и хеликоптери, војници и монтажни мостови.
Хрватска и Унгарија помогнаа со хеликоптери, а Германија со тим за цивилна заштита.
(Фото: СТА / Метеоинфо Словенија)
