Шпанците се револтирани од призорот групи туристи во бикини како шетаат по улиците на Палма де Мајорка, главниот град на Мајорка, откако наводно пристигнале со „брод за забава“ – најновата појава што ги разбесни локалните жители.
Видеото што го сподели здружението на жители на Пасео Маритимо, прикажува пет жени како одат по патот, додека група посматрачи ги гледаат од страна.
„Почна сезоната на ‘бродовите за забави’“- напишаа група мештани на социјалните мрежи, тагнувајќи ги локалните власти.
„Полиција нема, ниту се очекува“, истакнаа тие.
Видеото предизвика бес кај другите загрижени локални жители кои напишаа бројни коментари за да го изразат својот став.
„Навистина одвратно и понижувачко“, напиша еден коментатор, кој додаде дека туристите што поскоро мора да се запрат.
Иако датумот кога е направено видеото е нејасен, објавено е само неколку дена откако туристка беше снимена во тесни зелени гаќички за капење, што предизвика бројни повици за тоа речиси голите туристи дури и да бидат уапсени поради нивното развратно однесување.
Лут од приливот на туристи, еден мештанин во коментар под снимката напиша дека туристите се „како канта што ја истресувате“.
Патем, посочи и дека никогаш никаде нема полиција.
Шпанците се вистински загрижени за тоа како да се управува со „прекумерниот туризам“.
Претходно оваа недела, жителите беа фрустрирани од фотографијата на турист кој шета низ Палма де Мајорка облечен само во зелени гаќи за капење.Мажот, кој не е идентификуван, се шетал низ градот оскудно облечен, со црвена крпа за плажа.Виден е како оди по прометна улица, со десетици луѓе околу него во областа Хаума.
Еден огорчен корисник на социјалните мрежи го нарече човекот „уште еден морон кому треба да му биде забранет пристап до островот“.
„Ако владата и полицијата се сериозни, може полека да ја подобрат Мајорка со забрана на сите овие видови идиоти“, напиша тој.
Иако островот привлекува многу посетители поради своите прекрасни песочни плажи, туристичките одбори повикуваат дека правилата за облекување „важат и надвор од плажата“, истакнувајќи дека изгледот го пресликува карактерот.
Некои ресторани, пак, воведоа посебни кодови за облекување, но тие се однесуваат само за одредени угостителски објекти – иако набрзо следеа нови мерки од летувалишта во Барселона, Виго, Сан Хуан и Плаја де Палма, и тоа за мокрење во море, танцување во барови и носење фудбалски дресови.
Инаку, во вторникот беше објавено дека Мајорка ќе го намали бројот на раскалашани и развратни туристи со воведување полициски час за алкохол во 21:30 часот, а Палма вети дека ќе воведе построги мерки за намалување на бројот на туристи.
Марија Фронтера, претседателка на Федерацијата на хотелиери на Мајорка, повика на донесување на „стратешки план“ за справување со пренатрупаноста, нагласувајќи ја „критичната“ состојба на ситуацијата.
Таа ја наведе потребата за „рамнотежа на соживот“ меѓу жителите и посетителите, при што жителите се повеќе се загрижени заради видот на туристи кои ги привлекува престојот на шпанско сонце.
Близу 11,47 милиони туристи ја посетиле Мајорка во 2022 година. До летото минатата година, првичните прогнози предвидуваа дека бројките за 2023 година ќе се зголемат, а само во јули има 5,9 отсто повеќе во однос на претходната година.
Многу островски дестинации се најдоа во ќор-сокак, сè уште се опоравуваат од ограничувањата за патувања поради пандемијата и со економии кои зависат од туристичките трошоци – но, исто така, треба да се земат предвид и потребите и чувствителноста на локалното население.
