НАТО денеска го избра холандскиот премиер, Марк Руте, за свој нов генерален секретар, во време кога на праг му беснее војната во Украина и кога постои голема неизвесност во поглед на идната позиција на САД кон трансатлантскиот сојуз.
Амбасадорите на земјите-членки на НАТО на состанок во седиштето на Алијансата во Брисел одлучија да го назначат Холанѓанецот Руте за следен генерален секретар, кој ќе ја преземе функцијата на 1 октомври годинава.
„Северноатлантскиот совет денес одлучи да го назначи Марк Руте за иден генерален секретар на НАТО, кој ќе го наследи Норвежанецот Јенс Столтенберг“, се вели во соопштението на НАТО.
Долгогодишниот холандски премиер ќе ја преземе функцијата на 1 октомври годинава, кога му истекува мандатот на Столтенберг.
Со ваквата одлука на Северноатлантскиот совет, прашањето за именување на нов генерален секретар беше тргнато од дневниот ред на претстојниот самит на НАТО, што ќе се одржи кон средината на следниот месец во Вашингтон.
Генералниот секретар на НАТО се избира со консензус на сите членки.
Традиционално, местото генерален секретар му припаѓа на некој од европските земји-членки, додека началникот на воениот штаб е Американец.
Назначувањето на Руте стана формалност откако неговиот единствен ривал за таа функција, романскиот претседател Клаус Јоханис, се повлече од трката откако не успеа да ја добие поддршката од сојузниците.
Руте рече дека со силно се радува за укажаната доверба и дека со нетрпение чека да ја преземе функцијата.
„Сојузот е и ќе остане основа на нашата колективна безбедност.
Водењето на оваа организација е должност што не ја сфаќам како лесна“, објави тој на платформата Х.
Веднаш откако минатата година изрази интерес за таа должност, Руте ја доби поддршката од клучните членки на НАТО, вклучувајќи ги Америка, Британија, Франција и Германија.
Другите беа порезервирани, особено источноевропските земји-членки кои веруваа дека оваа должност за првпат треба да оди кај некој од нивниот регион.
Но, на крајот го поддржаа.
Руте е жесток критичар на рускиот претседател Владимир Путин и верен сојузник на Украина.
Столтенберг после состанокот истакна дека топло го поздравува неговиот избор за свој наследник.
„Марк е вистински трансатлантист, силен лидер, градител на консензус. Знам дека го оставам НАТО во добри раце“, рече тој.
Руте, на чело на НАТО, ќе мора да ја одржи сојузничката поддршка за Украина во војната против руската инвазија, но и да спречи НАТО директно да се вклучи во војната.
Ќе треба да се носи и со можноста Доналд Трамп да се врати во Белата куќа по претседателските избори во ноември, кој е многу скептичен кон трансатланскиот сојуз и ја доведува во прашање подготвеноста на Америка да им помогне на другите членки доколку бидат нападнати.
(Фото: Кензо Трибулард / АФП)
