Oд денеска патниците, корисниците, гостите и персоналот на Меѓународниот аеродром Скопје и аеродромот Св. Апостол Павле во Охрид ќе имаат на располагање четири станици за полнење електрични возила. Оваа нова услуга е овозможена од ЕВН Македонија и е во согласност со стратегиите за одржливост и континуирано подобрување на услугите за клиентите на двете компании.
Како што информираат ЕВН и ТАВ Македонија, новопоставените станици за полнење на електрични возила, кои работат на наизменична и еднонасочна струја, се стратешки лоцирани на паркинзите на двата аеродрома и можат истовремено да полнат до осум електрични возила, шест на аеродромот во Скопје и две на охридскиот.
– Како прва компанија што воспостави национална инфраструктура за полнење електрични возила, продолжуваме да ги интензивираме нашите напори за проширување на мрежата за брзо полнење преку силни партнерства со бизнисите и локалните заедници. Нашата соработка со ТАВ Македонија ни овозможува дополнително да ја поддржиме мобилноста на сопствениците на електрични возила, што е дел од нашата долгорочна стратегија. Покрај обезбедувањето на преку 100 точки за полнење во 18 различни градови низ земјата, се фокусираме и на поставување брзи полначи долж клучните патнички коридори што возачите ги користат за национални и за меѓународни патувања, изјави Волфганг Маиер, претседател на Управниот одбор на ЕВН Македонија.
Техничките тимови од ТАВ Македонија и ЕВН Македонија, како што се наведува, соработуваа на овој проект, придонесувајќи кон пошироката мисија за промовирање на еколошката свесност. Покрај еколошките придобивки, воведувањето станици за полнење електрични возила ја нагласува посветеноста на двете компании кон иновации, задоволството на корисниците и унапредувањето на корпоративната општествена одговорност за да обезбедат одржлива иднина.
